Sapaly bilimdi qamtamasyz etý maqsatynda stýdentterdiń, ásirese aýyl-aımaqtardan kelip oqıtyndar úshin jataqhanalardaǵy áleýmettik ahýaldyń turaqtylyǵy asa mańyzdy. Bul máseleni qadaǵalap otyrý maqsatynda kez kelgen oqý ornynyń basshylyǵynyń arnaıy jumys jospary belgilengen. Town Hall formatynda kezdesý barysynda QazUPÝ-dyń basqarma tóraǵasy - rektory Darhan Bilálov stýdenttermen kezdesip, olardyń usynystaryn tyńdady.
Is-sharaǵa ýnıversıtettiń Áleýmettik damý jónindegi prorektory Shyńǵys Nurlanov jáne Akademııalyq máseleler jónindegi departament dırektory Haırýlla Janbekov qatysyp, suraqtarǵa jaýap berdi.
Stýdentterdiń turmys jaǵdaıyn bilý úshin jataqhanalardy aralap, kezdesý ótkizip, ýnıversıtette júrgizilip jatqan jumystardyń nátıjesimen tanysqan rektor bilim alýshylardy tolǵandyratyn máselelermen jete tanys ekendigin bildirdi. Aldaǵy ýaqytta da D.Bilálov barlyq saýaldar men usynystardy tyńdaýǵa daıyn ekendigin atap ótti. Stýdentterdiń bilim berý salasyndaǵy tehnologııalardy meńgerýdegi múmkindikteri, oqý úderisinde qoldanylatyn platformalardyń erekshelikterine nazar aýdarý da sapaly bilim berýdegi basty másele. Ýnıversıtettiń ınfraqurylymdyq jáne tehnıkalyq oqý qurylǵylarymen qamtamasyz etý qazirgi kezde kezeń-kezeńmen júzege asýda. Sonymen qatar akademııalyq úrdisterge de basymdyq beriledi.
Rektor pedagogtiń róli men onyń mártebesine qatysty máselelerdi de ortaǵa saldy. Búginde pedagog qyzmetiniń mańyzdylyǵy jáne onyń el men óskeleń urpaq aldyndaǵy jaýapkershiligi artyp keledi. Sondyqtan da jańa bilim men daǵdylardy ıgerip, olardy únemi jetildirip otyrý mańyzdy. Bolashaq pedagog retinde stýdentter qazirdiń ózinde óz aldyna kásibı jaýapkershilikti arttyrý mindetin qoıa bilýi kerek. Áleýmettik damý jónindegi prorektory Shyńǵys Nurlanuly jataqhanaǵa qatysty saýaldarǵa jaýap bere otyryp, ýnıversıtette bilim sapasyn arttyrý, bilim salasyna ózgeris engizý maqsatynda qolǵa alynyp jatqan jobalardyń birine toqtaldy. Bul joba álemniń kóptegen joǵary oqý ornynda júıeli qoldanylyp júrgen Honors College jobasy. Jobanyń maqsaty – pedagogıkalyq mamandyqtar boıynsha oqıtyn daryndy stýdentterge tereń bilimmen qatar daǵdylardy berý. Ol úshin emosıonaldy ıntellekt, krıterıaldy baǵalaý júıesi, bilim alýshylardyń, ásirese mamandandyrylǵan NZM, RFMM, BIL, BINOM jáne t.b. mektepterde zertteý daǵdylaryn damytý syndy baǵyttar boıynsha daryndy stýdentter tizimi jasalyp, sertıfıkattalǵan oqytý baǵdarlamalary engiziletin bolady.
Departament dırektory Haırýlla Janbekov oqý úderisi men oqý formaty, aýysý, akademııalyq utqyrlyqqa qatysty jıi qoıylatyn suraqtarǵa jan-jaqty jaýap berdi. Town Hall formatyndaǵy kezdesýde stýdentter óz ıdeıalary men pikirlerin, usynystaryn erkin bildirip, suraqtar qoıdy. Osyndaı kezdesýlerdiń arqasynda ýnıversıtet aldynda turǵan ózekti máseleler boıynsha óz pikirlerin qalyptastyra alatyn bilim alýshylardyń, professor-oqytýshylar men qyzmetkerlerdiń sany artyp keledi.
ALMATY