Jýyrda Aral aýdanyndaǵy Bógen aýyldyq okrýgine qarasty Qarashalań sý aıdyny aýmaǵyndaǵy Saǵynbaı kanalynda balyq shabaqtarynyń qyrylý faktisi belgili boldy. Osyǵan baılanysty BAQ ókilderi úshin baspasóz konferensııasyn ótkizgen mamandar bul otteginiń azdyǵynan bolǵan degen boljam aıtyp otyr.
Aral-Syrdarııa oblysaralyq basseındik balyq sharýashylyǵy ınspeksııasy basshysynyń mindetin atqarýshy Janqoja Saparovtyń aıtýynsha, ınspeksııa tarapynan arnaıy top qurylyp, zerdeleý jumystary barysynda uzyndyǵy 1,2 shaqyrym, eni 16 metr bolatyn kanal boıynan birneshe oıyq jasalyp, sýdaǵy ottegi mólsheri 3,5 mg/dm³,
temperatýra 2,5ºS ekendigi anyqtalǵan.
Osy kúni balyqty saqtap qalý úshin qoldan ottegi berý jumystary qolǵa alyndy. Ottegi jetispeýshiliginen bólek balyqtyń qyrylýyna sýdyń azdyǵy, eki kanaldyń ortasynyń bólinip qalýy, muzdyń qalyńdyǵy da áser etken.
– Aral orman jáne janýarlar dúnıesin qorǵaý jónindegi memlekettik mekemesi qyzmetkerleri Saǵynbaı kanalynda 25 oıyq jasap, muz shuńqyrlaryna qamys salyndy, – dedi О́ńirlik kommýnıkasııalar qyzmetinde ótken baspasóz konferensııasynda oblystyq tabıǵı resýrstar jáne tabıǵat paıdalanýdy retteý basqarmasy basshysynyń mindetin atqarýshy Aıdos Aıaǵanov.
Tıisti oryn ókilderi balyqtan jáne sýdan alǵan synama boıynsha saraptama jumystaryn bastap ketti.
Qyzylorda oblysy