«Alǵysym sheksiz» merekelik telemarafony aıasynda «Habar» arnasynyń tikeleı efırinde Aqmola oblysynyń turǵyny 3 bólmeli páterdiń ıesi atandy. Igi shara «Hareket» qaıyrymdylyq qorynyń arqasynda júzege asty, dep habarlaıdy Egemen.kz atalǵan telearnanyń baspasóz qyzmetine silteme jasap.
Stýdııanyń qonaǵy bolǵan Baıan Baıramova - múmkindigi shekteýli jan. Kómekke muqtaj áıel búırek problemalaryna baılanysty jumys isteı almaıdy. 13 jyl boıy otbasymen baspana jaldaýǵa májbúr bolǵan Baıan Baıramova páteraqysyn tóleýge aqshasy jeter-jetpesteı edi. Úsh balanyń anasy búgin jańa úıdiń ıesi bolamyn dep kútpegen eken.
- Men úsh balanyń anasymyn, kishi qyzym balalar mılyq saldaný dıagnozymen dúnıege keldi. О́zim de 3-shi toptaǵy múgedekpin, búırekten aýyramyn. Biz 13 jyl boıy páter jaldap turdyq, árıne, óte qýanyshtymyz! Bul kútpegen jaǵdaı. Syılyq úshin «Hareket» Qoryna raqmet, - dedi Baıan Baıramova.
Esterińizge sala keteıik, Alǵys aıtý kúnine oraı búgin «Habar» arnasynda telemarafon ótti. Arnaıy jobanyń júrgizýshileri qoǵam paıdasy úshin qyzmet etip kele jatqan qazaqstandyqtar týraly sóz qozǵady. Olardyń barlyǵy janqııarlyq eńbekterimen qıyn jaǵdaıǵa tap bolǵan adamdarǵa kómektesedi. Qazaqstannyń túkpir-túkpirinen jáne álemniń birneshe elinen jınalǵan 15 qatysýshy merekelik shyǵarylymnyń basty keıipkerlerine aınaldy. Olardyń arasynda balalar da bar. Stýdııa qonaqtary ózderiniń oqıǵalarymen bólisip, jeke eskız boıynsha jasalǵan «Alǵysym sheksiz» dep atalatyn músinshelerge ıe boldy. Olardyń biri «Hareket» qaıyrymdylyq qorynyń ókiline tabystaldy.
- Kóktemniń tamasha kúninde «Habar» arnasynyń efırinde Baıramovtar otbasyna úsh bólmeli páterdiń kiltin syıladyq. Naýryz aıynyń 30 kúndiginde 70 otbasyǵa baspanaly bolýǵa kómektesýdi josparlap otyrmyz. Osynyń barlyǵy bizdiń qordy qoldaıtyn janashyr qazaqstandyqtardyń arqasynda múmkin bolyp otyr. Olardyń árqaısysyna alǵysymdy bildiremin, - dedi Nur-sultan qalasyndaǵy «Hareket» qaıyrymdylyq qorynyń ókili Aqtóre Erkin.