Mahambet aýdanynda Beıbarys degen aýyl bar. Burynǵy ataýy Chkalov edi. Elimiz táýelsizdik alǵannan keıin ózgerdi.
Bul aýylda qazaqpen birge ózge etnostyń ókilderi de turady. Onyń ishinde 1937 jyly Qazaqstanǵa kúshtep kóshirilgen koreıler de bar. Koreıler jergilikti turǵyndarmen qyz alysyp, qyz berisken qudandaly bolyp otyr.
Budan bes jyl buryn «Thonıl» koreı etno-mádenı birlestigi Beıbarys aýylynda «Qazaq halqyna myń alǵys!» sózi jazylǵan eskertkish ornatqan edi. Birlestik jetekshisi Lıýdmıla Lıdiń aıtýynsha, bul eskertkish – qıyn kezeńde jatsynbaı, baýyryna basqan qazaq halqyna sheksiz rızashylyqtyń belgisi.
– Koreıler qazaq jerinde ósip-ónip jatyr. Qazir Atyraý oblysynda 3 myńǵa jýyq koreı etnosynyń ókili turady. «Thonıl» etno-mádenı birlestigin quryp, tilimiz ben salt-dástúrimizdi jańǵyrtyp kelemiz. Birlestik músheleri óńirdegi mádenı-kópshilik is-sharalarǵa belsendi qatysyp júr, – deıdi Lıýdmıla Lı.
Atyraý oblysy