QR Syrtqy ister mınıstrligi men shetelderdegi mekemeleri Qazaqstan azamattaryn Ýkraınadan evakýasııalaý jumysy bastalǵannan beri 431 azamatqa, onyń ishinde Polshaǵa – 404 adamǵa, Moldovaǵa – 21 adamǵa, Majarstanǵa – 5 adamǵa, Slovakııaǵa – 1 adamǵa shyǵýǵa járdem kórsetti, dep habarlaıdy Egemen.kz.
Qazaqstandyq dıplomattar joǵaryda atalǵan memleketterdiń shekarasynan ótýdi, azamattardy jınaýdy jáne Qazaqstanǵa odan ári jetýdi qamtamasyz etedi.
Air Astana áýekompanııasynyń eki evakýasııalyq ushaǵy 299 adamdy shyǵaryp úlgerdi, olar Katovıse qalasynan (Polsha) Almaty men Nur-Sultan qalalaryna jetti.
Sonymen qatar 3 naýryzda úshinshi evakýasııalyq ushaqty jiberý pysyqtalýda.
Qazirgi ýaqytta Katovıse qalasynda 68 QR azamaty elge oralatyn ýaqytty kútip otyr.
Buǵan deıin shekarany ótken birqatar azamattar EO aýmaǵynda qalýǵa sheshim qabyldady. Sonymen qatar, azamattarymyzdy ýkraın-polıak shekarasyna jetkizý úshin Kıevten 57 adamǵa jáne Lvovtan 41 adamǵa sapar uıymdastyryldy.
«Atameken» UKP bergen aqparatyna sáıkes, Ýkraınadaǵy áskerı shıelenis bastalǵannan keıin el aýmaǵynda 47 júrgizýshi – QR azamattary jáne 8 júrgizýshi – shet memleket azamattary bar jalpy 55 avtokólik qaldy.
Qazirgi tańda qazaqstandyq dıplomattardyń kómegimen 55 avtokólik quraldarynyń ishinen júrgizýshilermen birge 13 avtokólik ýkraın-reseılik shekarasy arqyly Reseı aýmaǵyna, 8 avtokólik Moldovaǵa jáne 3 avtokólik Polshaǵa shyǵýǵa qolǵabys kórsetildi. Qolda bar derekter boıynsha, qazaqstandyq tasymaldaýshylardyń 31 avtokólik quraly Ýkraına aýmaǵynda qaldy. Azamattardyń jáne júk tasymaldaýshylardyń ornalasqan jerine baılanysty QR Reseıdegi, Belarýstegi, Polshadaǵy, Slovakııadaǵy, Majarstandaǵy, Rýmynııadaǵy jáne Moldovadaǵy sheteldik mekemeleri olarmen turaqty baılanysta jáne bolý eliniń bıligimen bul aýmaqtar arqyly evakýasııalaýdy pysyqtaýda, sondaı-aq neǵurlym qaýipsiz evakýasııalyq joldardy usynýda.