Gagarın kýbogy jolyndaǵy pleı-off básekesinde baq synap jatqan elordanyń «Barysy» bul joly da «Metallýrgten» aılasyn asyra almady. «Barys Arenada» ótken úshinshi kezdesýde qonaqtar 5:3 esebimen jeńiske jetti.
Magnıtogorskide ótken alǵashqy eki oıynda eki komanda da bir-bir jeńiske qol jetkizgen edi. Birinshi matchta «Barys» 3:2 esebimen basymdyq tanytqan bolsa, ekinshi kezdesýde muzaıdyn ıeleri jeńiske jetti – 6:2. Elordadaǵy úshinshi básekede de qarsylastar qarymdy boldy. Oıynnyń alǵashqy mınýttary «Barystyń» basymdyǵymen bastalsa da, 2-mınýtta san basymdyǵyna ıe bolǵan qarsylastar ońtaıly sátti múlt jibergen joq. Semıon Koshelev mergendigimen kózge túsip, esep ashty. Budan keıin de «Metallýrg» hokkeıshileri Ortıo qorǵaǵan qaqpaǵa jaýapsyz tórt shaıba soqty. Gol avtorlary – Pavel Akolzın (22-mınýt), Fılıpp Maıe (24-mınýt), Grıgorıı Dronov (35-mınýt), Maksım Karpov (44-mınýt).
Tablodaǵy kórsetkish 5:0-ge jetken kezde ǵana «Barys» oıynshylary es jııa bastady. Biraq bul kezde matchtyń aıaqtalýyna 11 mınýt qalǵan edi. Dese de osy ýaqyt aralyǵynda jerlesterimiz qarsylas qaqpasyn úsh márte dál kózdedi. Bul oıynda Kıortıs Valk (49-mınýt), Nıkıta Mıhaılıs (51-mınýt), Kodı Kýnık (59-mınýt) mergendik tanytty.
Eki komanda arasyndaǵy tórtinshi kezdesý búgin de elordada ótedi.