Túrkistan oblysy, Kentaý qalasynyń ákimi taǵaıyndaldy. Oblys ákimi О́mirzaq Shókeevtiń ókimimen jáne Prezıdent Ákimshiliginiń kelisimimen bul qyzmetti Rashıd Aıýpov atqaratyn boldy, dep habarlaıdy Egemen.kz.
Oblys basshysy jańa ákimdi tanystyrý kezinde onyń jumysyna sáttilik tilep, turǵyndardyń ál-aýqatyn jaqsartý úshin áleýmettik-ekonomıkalyq baǵyttaǵy jumystardy kúsheıtýdi tapsyrdy.
Sondaı-aq Memleket basshysynyń tapsyrmalaryn merzimdi ári nátıjeli oryndaýdy basty nazarǵa alýdy mindettedi. 100 myńnan astam turǵyny bar Kentaý qalasynyń jańa ákimine úlken jaýapkershilik júktelip otyrǵanyn aıtyp, abyroıly eńbek etetinine senim bildirdi.
О́z kezeginde Rashıd Aıýpov aımaq basshysyna senim bildirgeni úshin alǵysyn jetkizip, aldaǵy ýaqytta Kentaý qalasynyń damýy men órkendeýi jolynda bar kúsh-jigerin jumsaıtynyna ýáde berdi.
Rashıd Aıýpov 1981 jyly Kentaý qalasynda týǵan. 2019 jyldyń shilde aıynan 2021 jylǵa deıin Túrkistan qalasynyń ákimi qyzmetin atqardy. О́tken jyldan beri Túrkistan oblysy ákiminiń orynbasary laýazymynda boldy.
Al buǵan deıin Kentaý qalasynyń ákimi qyzmetin atqarǵan Dáýren Mahajanov asa iri kólemde para aldy degen kúdikke ilingen edi. Ol oblys ákiminiń ókimimen bul qyzmetten bosatyldy.