Qazaqstan dzıýdo federasııasynyń prezıdenti Qaırat Qojamjarovtyń ókilettiligi merziminen buryn toqtatylýyna baılanysty prezıdent mindetin atqarý federasııanyń bas hatshysy Ashat Jitkeevke júkteldi, dep habarlaıdy Egemen.kz. Ulttyq olımpıada komıtetine silteme jasap.
О́z kezeginde Qaırat Qojamjarov otandyq dzıýdo qaýymdastyǵyna alǵysyn bildirdi. «Dzıýdo federasııasynyń prezıdenti ókilettigin merziminen buryn toqtatýyma baılanysty barlyq qazaqstandyq dzıýdoshylarǵa, jattyqtyrýshylarǵa, federasııa menedjerlerine, Dzıýdo dep atalatyn úlken otbasymyzǵa shynaıy alǵysymdy bildiremin! Sizdermen birge jumys istegen qysqa merzim ishinde joǵary kásibıliktiń jáne jattyqtyrýshylar men sportshylardyń kúsh-jigeriniń arqasynda joǵary jetistikterge qol jetkizildi. Halyqaralyq týrnırlerde 400-den astam medal jeńip aldyq. 2019 jyly 16 salmaq dárejesinde álemniń 61 elinen 462 sportshynyń qatysýymen uldar men qyzdar arasynda álem chempıonaty sátti ótti.
2021 jyldyń qorytyndysymen medaldar sany boıynsha Qazaqstan IJF halyqaralyq reıtınginde 5-oryn ıelendi. 2021 jyly bizdiń Eldos Smetov Tokıo-2020 XXXII jazǵy Olımpıada oıyndarynyń qola júldegeri atandy. Sizderge birlesken tabystarymyz úshin shyn júrekten alǵysymdy bildiremin! Sizderge jańa jetistikter men jeńister tileımin!», - dedi ol.
Qaırat Qojamjarov 2018 jyldyń 23 qazanynan bastap Qazaqstan dzıýdo federasııasynyń prezıdenti qyzmetin atqaryp keldi. Federasııanyń jańa prezıdenti arnaıy konferensııada saılanatyn bolady.