Qazaqstan koreıleriniń 30 paıyzy derlik asqar Alataý baýraıyndaǵy arý qalada turady. Bıyl Almaty koreıleri ortalyǵy óziniń 25 jyldyǵyn atap ótýde. Ol Qazaqstannyń barlyq etnostaryna tolyqqandy ómir súrý múmkindigin syılaǵan bizdiń elimizdiń táýelsizdigimen qatar qurylyp, qatarlasa damyp keledi.
Qazir biz aldaǵy 18 sáýirde «2050» Strategııasy – álem mádenıeti, rýhanııat jáne kelisim» degen uranmen ótetin Qazaqstan halqy Assambleıasynyń XXI sessııasyna úlken jaýapkershilikpen daıyndalýdamyz. Bizdiń mindet – árqaısymyz óz ornymyzda qoǵamymyzdyń birligin odan ári nyǵaıtýǵa naqty úles qosý.
Kelesi jyly Qazaqstan halqy Assambleıasyna 20 jyl tolady. Alys-jaqynǵa tanymal bul uıym abyroıly asý-belesterden súrinbeı ótti. Barshamyz tarıhtyń tutastaı tegeýrindi qadamynan kórip otyrǵanymyzdaı, bizdiń turaqty damýymyz, eń bastysy – myna beımaza álemdegi berekeli de baıandy tynyshtyǵymyz etnosaralyq qatynastardy úılestirý oraıyndaǵy osynaý ınstıtýttyń mańyzdylyǵyn aıǵaqtaı túsýde. Al bul bereke-birlikti jan-jaqty nyǵaıtyp, damyta berýimiz kerektigin biz jaqsy túsinemiz.
Qazaqstanda 130-dan asa ult bar. Solardyń 60-tan astamy, sonyń ishinde koreıler de baıyrǵy qazaq jerine zorlyq-zombylyqpen jer aýdarylǵan bolatyn. Biz sol bir qıyn-qystaý jyldarda ákelerimiz ben atalarymyz qazaq halqynyń qoldaýy men kómeginiń, shapaǵaty men meıiriminiń arqasynda jan saqtaǵanyn, shynaıy dostyq-birliktiń sol kezde órken jaıǵanyn áste umytpaımyz. Qazir bizdiń otbasylarymyzdyń da kópultty bolyp keletini úırenshikti jaıǵa aınaldy.
Aıtalyq, meniń ózimniń nemerelerim – qazaq. Qazaqpen qany qosylǵan koreıler jeterlik. Basqa ulttar tarapynan da osyndaı úrdisti molynan baıqaımyn. Osynyń ózi-aq jarasymdy birligimizdi, berekeli tirligimizdi kórsetpeı me? Endeshe, osyndaı dostyǵymyzdy, birligimiz ben tatýlyǵymyzdy kózdiń qarashyǵyndaı saqtaýǵa tıispiz. Elbasy Nursultan Nazarbaevtyń alǵa qoıǵan strategııalyq maqsattaryn tabysty oryndaýdyń kepili de osy aıtylǵandar ekeni kúmánsiz.
Bronıslav ShIN,
QHA múshesi, Almatydaǵy koreı ulttyq
ortalyǵynyń tóraǵasy,
Almaty qalalyq máslıhatynyń depýtaty.
Almaty.