Demalys kúnderi tolassyz jaýǵan jańbyrdyń jáne egistik alqaptardy sor shaıýdyń aǵyn sýlarynan Maqtaaral aýdany Atakent kentinde sý basý qaýpi týyndady. Oǵan №32 «Batys» kollektoryna sý tolyp, erneýinen asyp ketýi de óz septigin tıgizgen. Aýdandyq tótenshe jaǵdaılar men azamattyq qorǵaýdyń ınjenerlik qurylymynyń arnaıy tehnıkalary shuǵyl jetip, K-18 kanaly men kollektorlar aralyǵyndaǵy 100 metr jeri qazylyp, jınaqtalǵan sýlar №43 «Shyǵys» kollektoryna tastaldy.
Maqtaaral aýdandyq shekara basqarmasynyń kelisimimen О́zbekstan Respýblıkasymen shektesetin shekaranyń beıtarap aýmaǵyndaǵy «Shyǵys» kollektorynyń eki jaǵynda ornatylǵan temir torlary alynyp, sý ótkizgish qabiletti arttyryldy. Atakent kentiniń egistik alqaptardyń aıaq jaǵynan ónimdiligi saǵatyna 100 tekshe metr sý sorǵy nasostar ornatylyp, K-18 kanalyna tastaldy. Sondaı-aq bul kúni qatty jaýyn-shashyn saldarynan Atakent kenti, Maqtaaral, J.Nurlybaev, Dostyq, Jańajol, Jambyl aýyldyq okrýgteri aýmaǵynda jer asty sýy deńgeıi kóterilip, birneshe úılerdiń aýlasyna sý tolǵandyǵy jóninde aýdandyq órt sóndirý beketteriniń baılanys bólimine turǵyndardan habarlama túsken. Ol boıynsha jergilikti atqarýshy jáne tótenshe jaǵdaı bóliminiń qyzmetkerleri tarapynan aýmaqtan sý soryp shyǵarý jumystary júrgizildi. Aýdan ákimdiginiń habarlaýynsha, 60-qa jýyq sý sorǵyshtar kósheler men úıdiń aýlalaryna tolǵan sýdy shyǵarý jumystarymen aınalysty.
Jalpy, Túrkistan oblysynda sý tasqynyna qarsy qaýipsizdik jumystary josparǵa saı júrgizilýde. Tótenshe jaǵdaılar departamenti bastyǵynyń orynbasary E.Sarybaevtyń aıtýynsha, qazirgi tańda oblys aýmaǵynda sý tasqyny boıynsha jaǵdaı bir qalypty, turaqty baqylaýda. Sý tasqynynyń aldyn alý maqsatynda Túrkistan oblysynda 1 200 shaqyrymnan astam 680 aryq, kanal qoqystan tazartyldy, 61 500 dana qap, 482 tonna ınertti materıal ázirlengen. Jergilikti atqarýshy organdar men tótenshe jaǵdaılar departamenti tarapynan jalpy 2 065 adam, 400 birlik tehnıka, 6 qaıyq, 294 motopompa daıyndyqqa keltirilgen. Sý qoımalary men ózenderdiń sý rejimine kúndelikti monıtorıng júrgizilýde. Oblys boıynsha sý qoımalarynyń ortasha tolýy 45-50%-dy quraıdy. Iаǵnı tasqyn sýlardy qabyldaýǵa jetkilikti oryn bar.
Túrkistan oblysy