Qazaqstan Ulttyq banki qoldanystaǵy zańnamaǵa sáıkes, Qazaqstan aýmaǵynda qolma-qol shetel valıýtasyn aıyrbastaý operasııalaryn tek ekinshi deńgeıli bankter men ózderine berilgen lısenzııa negizinde banktik emes aıyrbastaý pýnkteri ǵana júrgizýge quqyly ekenin habarlaıdy, dep jazady Egemen.kz Ulttyq banktiń baspasóz qyzmetine silteme jasap.
«Qolma-qol valıýtalardy joǵaryda kórsetilgen valıýta aıyrbastaý pýnkteri arqyly aıyrbastaý – qarjy qyzmetin paıdalanýshylar quqyǵynyń qorǵalýyn qamtamasyz etedi. Jumys istep turǵan banktik emes aıyrbastaý pýnkteriniń mekenjaıy men qosymsha aqparattardy QUB-tyń saıtynan alýǵa bolady.
Sondaı-aq QUB tıisti lısenzııasyz aıyrbastaý operasııalaryn júrgizý zańsyz kásipkerlik túrine jatatyndyǵyn, ol úshin QR Ákimshilik quqyqbuzýshylyq týraly Kodeksiniń 155, 463-baptarymen jáne QR Qylmystyq Kodeksiniń 214-babymen ákimshilik jáne qylmystyq jaýapkershilik kózdelgenin eskertedi. Zańsyz deldaldar, onyń ishinde ınternet alańdary men áleýmettik jeliler arqyly aıyrbastaý operasııalaryn júrgizýdi usyný – zańsyz sanalady jáne jalǵan moneta jasaýshylarmen mámile jasaý qaýpin týdyrady.
QUB múddeli memlekettik jáne quqyq qorǵaý organdarymen birlesip, ishki qolma-qol shetel valıýtasy naryǵyndaǵy jaǵdaıǵa turaqty monıtorıng júrgizip keledi.
Qazirgi ýaqytta Qazaqstan Respýblıkasynda valıýta aıyrbastaýdyń, sol sııaqty tólem kartochkalaryn paıdalaný, onlaın-bankıng sekildi balama túrleri de qarastyrylǵan, olar áldeqaıda qoljetimdi ári 24/7 rejıminde qaýipsiz qyzmet kórsetedi.
Eske sala keteıik, qarjylyq turaqtylyqqa tóner qaýip-qaterdiń aldyn alý jáne spekýlıatıvti qysymdy tómendetý maqsatynda 2022 jyldyń 14 naýryzynda «Qazaqstan Respýblıkasynda qarjylyq turaqtylyqty qamtamasyz etý sharalary týraly» Qazaqstan Respýblkasy Prezıdentiniń Jarlyǵy qabyldanǵan bolatyn.
Qazirgi tańda qolma-qol shetel valıýtasymen qamtamasyz etý máselesi turaqtaldy, turǵyndar tarapynan suranysqa qatysty dúrligý baıqalmaıdy.
El ishinde ishki valıýta naryǵynyń turaqtylyǵyn qamtamasyz etýge yqpaldasý maqsatynda QUB ekinishi deńgeıli bankterdi qajettiligine qaraı qolma-qol shetel valıýtasymen qamsyzdandyryp otyr» delingen habarlamada.