Ulttyq akademııalyq kitaphanada belgili qazaq jazýshysy jáne jýrnalıst Erkinbaı Ákimqulovtyń «Shámshi Qaldaıaqov - án patshasy» roman-essesiniń ekinshi basylymy tanystyryldy, dep habarlaıdy Egemen.kz.
Kitaptyń taralymy 12 myń danany quraıdy. Oqyrmandar shyǵarmamen elimizdiń oblystyq, qalalyq jáne aýdandyq kitaphanalarynda tanysa alady.
Alǵash ret 2012 jyly jaryq kórgen roman keń aýdıtorııanyń qurmetine ıe bolyp, jazýshylar qaýymdastyǵynda joǵary baǵalandy. Kitaptyń ereksheligi - sıýjetti basty keıipkerdiń atynan usyný.
Kitap QR Mádenıet jáne sport mınıstrliginiń qoldaýymen shyǵarylǵan.
«Bul roman alǵash ret 2012 jyly jaryq kórip, oqyrmandar arasynda joǵary baǵalandy. Sol jyly Qazaqstan Jazýshylar Odaǵy romandy Memlekettik syılyqqa usyndy. Bul kitaptyń ekinshi basylymy QR Parlamenti bir top depýtattarynyń bastamasymen jaryq kórdi. Men olarǵa bul úshin rızamyn. Mádenıet jáne sport mınıstrligine de osy bastamany qoldaǵandary úshin alǵysymdy bildiremin», dedi Erkinbaı Ákimqulovtyń qyzy Quralaı Ákimqulova.
Erkinbaı Ákimqulov pen Shámshi Qaldaıaqovtyń stýdenttik jyldardan bastalyp, kompozıtor ómiriniń sońyna deıin jalǵasqan dostyǵy roman avtoryna basty keıipkerdiń san qyrly tulǵasyn ashýǵa, onyń ómirin barynsha shynaıy kórsetýge múmkindik bergen.
Kitapta sol dáýirdegi kóptegen memleket jáne qoǵam qaıratkerleriniń, uly kompozıtor jumys istegen, kezdesken jáne dos bolǵan áıgili aqyndar, jazýshylar, akterler, ánshilerdiń beıneleri de bar.
«Bala kezimde Shámshi aǵaıdyń jıi qonaqqa kelgeni, biz ony Jámılá apaı dep ataǵanymyz, olardyń aqyndar men ádebıetshiler arasyndaǵy suhbattary esimde. Biz uzaq jyldar boıy kompozıtordyń úlken uly Qasym Qaldaıaqovpen aralasyp kelemiz. Meniń ákem bul kitapty 2007 jyly bastap, 2012 jyly jaryqqa shyǵardy. Qaldaıaqovtyń shyǵarmashylyǵy týraly alǵashqy maqalasy 1969 jyly «Lenınshil jas» gazetiniń betine shyqqan bolatyn. Bul kitapta kompozıtordyń ómiri týraly kóptegen qyzyqty derekter bar», dedi Quralaı Ákimqulova kompozıtor jaıly jyly estelikterimen bólisip.
Is-sharada belgili memleket jáne qoǵam qaıratkerleri, sondaı-aq avtordyń otbasy músheleri sóz sóıledi.
«Bul kitaptyń tarıhy erekshe. Jurtshylyqtyń ótinishi boıynsha ekinshi basylym jarııalandy. Shámshi Qaldaıaqovty bilmeıtin qazaq joq. Ol kóptegen tanymal ánderdiń avtory ǵana emes, sonymen qatar Memlekettik Ánuran avtorlarynyń biri. Erkinbaı Ákimqulov Shámshi Qaldaıaqovtyń zamandasy bolǵan jáne oǵan dos ári shyǵarmashyl adam retinde jaqyn bolǵan. Bul kitapta kompozıtordyń ózi týyp-ósken aýyldaǵy ómirinen bastap mansabynyń shyńyna deıingi ómir kezeńi sıpattalǵan. Erkinbaı Ákimqulov - óziniń jazý stıli bar biregeı jazýshy. О́kinishke oraı, ol 2019 jyly qaıtys boldy. Búgin osy kitaptyń tusaýkeserin ony eske alý úshin uıymdastyrdyq. Onyń shyǵarmasy óz oqyrmandaryn tabady dep senemin», dedi QR Májilis depýtaty Darhan Myńbaı.
Kitaptyń alǵy sózin jazǵan saıası qaıratker Qýanysh Sultanov ta sóz sóılep, jyly lebizin bildirdi.
«Erkinbaı Ákimqulov bilimqumar adam bolatyn. Basqa eńbekterin aıtpaǵanda, onyń eki kitaby jaqsy mysal bola alady. Bireýi О́zbekáli Jánibekovke, ekinshisi Shámshi Qaldaıaqovqa arnalǵan kitaptary», dedi Qýanysh Sultanov.