Kongo Demokratııalyq Respýblıkasyndaǵy BUU bitimgershilik mıssııasynyń segiz qyzmetkeri pákistandyq tikushaq apatynan qaza tapty, dep habarlaıdy Egemen.kz Deutsche Welle agenttigine silteme jasap.
Kongo Respýblıkasynyń qarýly kúshteri tikushaqty kóterilisshiler eldiń shyǵysynda atyp túsirdi dep málimdedi. Soltústik Kıvý provınsııasynyń áskerı gýbernatorynyń baspasóz hatshysy Sılven Ekenge tikushaqtyń M23 toby baqylaýyndaǵy aımaqqa qulaǵanyn aıtty.
BUU bitimgershilik mıssııasy MONUSCO bitimgerlik kúshterdiń Soltústik Kıvý provınsııasyndaǵy Rýtshýrýdan ońtústik-shyǵysqa qaraı Sansıý ústinde barlaý ushaǵynda bolǵanyn habarlady.
«Segiz adam qaza tapty. Onyń altaýy ekıpaj múshesi, olar Pákistannan, sondaı-aq Reseı men Serbııadan kelgen eki áskerı qyzmetker bar», delingen habarlamada.
Uıym qarýly toptar arasyndaǵy qııan-keski qaqtyǵystar saldarynan eldegi jaǵdaıdyń nasharlaýy jalǵasyp jatqanyn, bul beıbit turǵyndar sanynyń artýyna jáne adamdardyń jappaı qonys aýdarýyna ákelip soqtyrǵanyn aıtty.
Basylymnyń málimetinshe, jańa qaqtyǵystar 6 myńǵa jýyq beıbit turǵyndy Kongo Demokratııalyq Respýblıkasynan kórshiles Ýgandaǵa qashýǵa májbúrlegen. Ýgandadaǵy Qyzyl Krest ókili Iren Nakashıta bosqyndardyń Býnaganedegi tranzıttik lagerde ekenin jáne odan da kóp adam keledi dep kútilgenin aıtty. Ýgandada qazirdiń ózinde Ońtústik Sýdan men Kongo DR-dan 1,5 mıllıonǵa jýyq bosqyn bar ekeni kórsetilgen.