Úkimet basshysynyń orynbasary Eraly Toǵjanov Májiliske kelip, depýtattarǵa halyqtan túsken ótinishterdi úkimet qalaı qarap jatqanyn baıandady, dep habarlaıdy Egemen.kz.
«Áleýmettik salanyń barlyq suraǵyn shuǵyl, bir-eki jyldyń ishinde sheshý múmkin emes ekeni ózderińizge belgili. Keıbir máseleler eldiń ekonomıkalyq múmkindikteri eskerile otyryp, kezeń-kezeńimen júzege asyrylady. Sondyqtan zeınetaqy júıesine qatysty, áleýmettik tólemderdiń kólemine qatysty naqty suraqtar ázirlenip jatqan Áleýmettik kodeks aıasynda, ózderińizben birge qarastyrylatyn bolady», dedi Toǵjanov.
Baıandamashynyń sózine súıensek, depýtattar men úkimetke kelip jatqan ótinishterdiń máni birdeı – naqty tabysty arttyrýǵa, kedeılik deńgeıin tómendetýge qatysty.
Depýtattardyń óńirlerge sapary barysynda eki myńǵa jýyq suraqtar kóterilgen. Úkimetke azamattardan 1800 ótinish tikeleı kelip túsken.