QR Parlamenti Májilisiniń depýtaty Aıbek Paıaev taý-ken salasyn ákimshilendirý sharalaryn qaıta qaraýdy usyndy, dep habarlaıdy Egemen.kz.
Májiliste «QR Ulttyq qorynan 2022-2024 jyldarǵa kepildendirilgen transfert týraly» QR zańyna ózgeris engizý týraly» Zań jobasy qaralyp jatyr.
Jıyn barysynda BAQ ókilderine suhbat bergen Májilis depýtaty Aıbek Paıaev naqtylanǵan bıýdjettiń shyǵys bóligi, jalpy alǵanda, oryndy degen pikir aıtty.
«Bıýdjettiń shyǵys jaǵy ulǵaıyp jatqanyn bilesizder. Onyń naqty sebepteri bar. Qańtardyń basynda Prezıdent birneshe tapsyrma berdi. Joldaýynda da aıtyp ketti. Osy tapsyrmanyń bárin júzege asyrý úshin qomaqty qarajat bólinip otyr.
Bıýdjettiń shyǵys bóligi 4 trln teńgege ulǵaıdy desek, onyń ishinde Ulttyq qordan qosymsha 1 trln 636 mlrd teńge bólinip jatyr. Árıne, úlken aqsha. Onyń bári eldegi turaqtylyqty saqtap, memleket ekonomıkasynyń ári qaraı damýyna úles qosýǵa, óńirlerdi damytyp, eń basty másele, bul qarajattyń bári halyqqa tolyǵymen jetýi kerek. Sondaı-aq keleshekte salyq bazasyn keńeıtý arqyly Ulttyq qorǵa qaıtyp túsýi kerek», dedi ol.
Depýtat keleshekte Ulttyq qorǵa qol jaıa bermes úshin fıskaldyq saıasatty qaıta qaraý kerek degen paıym aıtty.
«Men Ulttyq ekonomıka mınıstrligine suraq qoıyp otyrmyn. Keleshekte salyq bazasyn ulǵaıtý arqyly, jalpy taý-ken salasyndaǵy ákimshilendirýdi sapaly júzege asyrý arqyly, sol jerdegi salyqtyq júktemeni qaıta qaraý arqyly bıýdjetke qomaqty qarajat túsirýge bolady. Biz ony mindetti túrde isteýimiz kerek. О́ıtkeni bıyl fıskaldyq organdar respýblıkalyq bıýdjettiń kiris bóligin 955 mlrd teńge artyǵymen oryndaýy kerek», dedi Aıbek Paıaev.
Aıta keteıik, buǵan deıin QR Ulttyq ekonomıka mınıstri Álibek Qýantyrov jýrnalısterge Ulttyq qordan kepildendirilgen transfertti naqtylaý ne úshin qajet bolǵanyn túsindirgen bolatyn.