Premer-Mınıstrdiń orynbasary Prezıdentke halyqtyń tabysyn arttyrý baǵdarlamasynyń júzege asyrylý barysy týraly málimet berdi, dep habarlaıdy Egemen.kz Aqordaǵa silteme jasap.
Eraly Toǵjanov Qasym-Jomart Toqaevqa jalaqyny kóterý isiniń 1 mıllıonnan astam bıýdjettik sala qyzmetkerleri men kvazımemlekettik sektordyń óndiristik personalyn qamtıtynyn habarlady. Sondaı-aq kásipkerlikke mindettemeler belgileý arqyly memleketten kómek alatyn iri bıznestegi 2,8 mıllıon qyzmetkerdiń eńbek tabysyn arttyrý qarastyrylǵan.
Memleket basshysyna kásipkerlik qyzmettiń tabysyn arttyrýǵa, sondaı-aq farmasevtıka, bıotehnologııa, IT-tehnologııa jáne munaı-hımııa baǵytyndaǵy jańa óndirister sııaqty ekonomıkanyń túrli salalaryndaǵy ınvestısııalyq jobalardy iske asyrý arqyly jańa jumys oryndaryn ashýǵa qatysty Úkimettiń jospary baıandaldy.
Sonymen qatar Eraly Toǵjanovtyń aıtýynsha, halyqtyń áleýmettik jaǵdaıy tómen toptaryn qoldaý sharalary qarastyrylǵan. Máselen, «Baqytty otbasy» jobasy aıasynda kópbalaly jáne múmkindigi shekteýli balalardy tárbıelep otyrǵan 20 myń áıel jumyspen qamtylady. Jastardy jumysqa ornalastyrý úshin «Jastar tájirıbesi» jáne «Alǵashqy jumys orny» jobalary júzege asyrylyp, 400 aılyq esepti kórsetkishke deıin granttar beriledi.
Kezdesý sońynda Prezıdent halyqtyń tabysyn arttyrýdyń aıryqsha mańyzdy ekenin atap ótip, Úkimetke bul máseleni erekshe baqylaýda ustaýdy tapsyrdy.