Shyǵys Qazaqstan oblysy aýmaǵyndaǵy Tarbaǵataı taýynyń tabanynda 30 mln. tonnaǵa jýyq munaı qory bar ekeni aıǵaqtaldy. Bul týraly keshe jýrnalısterge geologııa jáne jer qoınaýyn paıdalaný komıtetiniń tóraǵasy Bazarbaı Nurabaev málimdedi.
«Búginde Qazaqstan qorynda 76 mıllıard tonnaǵa jýyq munaı bar. Onyń ishinde ıgerilgeni, ıgerilmegeni bar. Osy turǵyda bizge zertteý jumystaryn qolǵa alyp, geologııalyq-barlaý jumystaryn jan-jaqty júrgizý kerek», - dedi ol.
Komıtet tóraǵasynyń aıtýynsha, Soltústik Qazaqstan jáne Qostanaı oblystary aýmaqtary men Tarbaǵataı taýynyń qoınaýy munaı qoryna baı. Sonyń ishinde Tarbaǵataıdaǵy munaıdyń kólemi 30 mln. tonna ekeni belgili boldy.
B.Nurabaev sonymen qatar, Shyǵystaǵy munaıdyń sapasy aýyr ekenin de alǵa tartty. Sol sebepti ony óndirý ońaı bolmaıdy. Buǵan qosa, bul mańaıdyń aýa raıy da qolaısyz. Ken ornyn ıgerýde muny da eskerý qajet.
Komıtet tóraǵasy óziniń sózinde Qazaqstanda munaı-gaz qoryn zertteýdi «QazMunaıGaz» kompanııasy moınyna alatynyn jetkizip, barlaý jumystaryna atalmysh kompanııa 797 mlrd. qarjy bólýge ázir ekenin de aıtyp ótti.
Rýslan IGILIK.