Biliksiz maman búldiredi

Jalpy, ótken jyly oblys bıýd­jetine 98 mlrd. teńgeden astam qarjy túsipti. Naqtylaı kelgende 1 mlrd. 243 mln. teńge ıgerilmeı qalǵan. Bul máseleler oblystyq máslı­hattyń kezekti sessııasynda aıtyldy. Oblystyq tekserý komıssııasynyń tóraǵasy Serik Baıseıitovtiń baıandaýynsha, ótken jyldyń bıýdjetin josparlaýda qatelikter bolypty. Salyqtyq qaryzdardy tómendetý jumysy da qolǵa alynbaǵan kórinedi. Muny oblys ákimi Qanat Bozymbaev bylaı túsindirdi. «Durys josparlaý júrgizilmeýi sebepti qyrýar qarjy ıgerilmeı qaldy. «Basty qarjy qujatyn josparlaýda qatelikterge jol berilgeni anyq. Qazir ózge óńir­lerden ekonomıka jáne bıýdjetti josparlaýdyń tájirıbeli mektebinen ótken saýatty qyzmetkerler izdeý­demiz. Endi josparlaýdyń árbir kezeńin Bıýdjet kodeksine sáıkes quratyn bolamyz. Shamaǵa qaraı ıgere alatyn qarjyǵa ǵana suranys beriledi». Oblystyq máslıhat depýtat­tarynyń ózderi de burynǵy bas­shylyqqa únsiz qoldaý kórsetip, bıýdjetti qabyldaýda kemshilik jibergen kórinedi. Mysa­ly, oblystyq densaýlyq saqtaý basqarmasynyń 5 aýylda feldsherlik bólimsheler salý úshin zańsyz qurylys júrgizgenderi belgili boldy. Oblystyq qurylys basqarmasy kásipkerlerge «sender feldsherlik bólimsheler qurylystaryn salyp berińder, biz ony satyp alamyz», dep ýáde de beripti. Biraq, oblys prokýrorlarynyń tekserýleri qurylys salýdaǵy bul konkýrstardyń barlyǵy da úlken qateliktermen, zańsyzdyqtarmen jasalǵanyn anyqtap berdi. Turǵyzylǵan feldsherlik bólimshelerdiń baǵalary kóterilgen. Osy arqyly 392 mıllıon teńge qoldy bola jazdady. Bul kúnderi qyzmetinen ketken oblystyq ekonomıka jáne bıýdjetti josparlaý basqarmasynyń burynǵy bastyǵy Álııa Arynova zańsyz tapsyrystardy qoldap, ony oblystyq máslıhattyń otyrysyna shyǵarady. Al, depýtattar bolsa, tipti, bul qarjyǵa esh kúmán keltirmesten-aq biraýyzdan qoldap jiberedi. Bul bir ǵana mysal. О́tken jylǵy memleket qarjysyna qol suqqandardyń bylyq-shylyqtarynyń kókesin qazir zań oryndary tekserýde. Budan bylaı sheshim qabyldaýdyń mundaı ádisterin tolyq ózgertemiz. Byltyr bıýdjetti ıgerýde kemshilik jibergender jazasyn aldy. Endi, aldaǵy eki aı ishinde olardyń 80 paıyzy ózge jumys ornyn izdeıtin bolady. Qurylys, jolaýshylar kóligi jáne avtomobıl joldary jáne turǵyn úı-kommýnaldyq sharýashylyǵy, basqa da salalarǵa bilikti mamandar keledi. Jyl sońyna qaraı oblystaǵy jaǵdaı ońalady dep oılaımyz. Ázirshe, kirisimiz az. Endi, qolda bardy tıimdi paıdalanýymyz qajet. Oblysta jumys júrgizip jatqan kompanııalardan bıýdjetke qarjy túsirýge kúsh salynady. Alda úlken jumystar kútip tur.Talap pen tártip bárimizge ortaq. Sondyqtan, máselelerdi birlesip oryn­daımyz dep sanaımyn, – dedi Qanat Bozymbaev. Farıda BYQAI, «Egemen Qazaqstan». Pavlodar oblysy.