Qazirgi ýaqytta Memleket basshysynyń tapsyrmasy boıynsha QR Energetıka mınıstrligi búkil el boıynsha elektr stansııalaryna aýqymdy tehnologııalyq aýdıt júrgizýde, dep habarlaıdy Egemen.kz mınıstrliktiń baspasóz qyzmetine silteme jasap.
2022 jylǵy 14 sáýirde QR Energetıka vıse-mınıstri bastaǵan QR Energetıka mınıstrliginiń ókilderi Temirtaý qalasyndaǵy JEO-2, «ArselorMıtallTemırtaý» AQ JEO-BAÚS jáne «Bassel Group LLS» JShS GRES-1 elektr stansııalaryna bardy.
Elektr stansııalaryn aralaý kezinde aǵymdaǵy jylytý maýsymynyń ózekti máseleleri jáne aldaǵy jylytý maýsymyna daıyndyq boıynsha josparlar qaraldy.
Elektr stansııalarynyń basshylary energııa jabdyqtaryn jańǵyrtý jáne jańartý boıynsha aldaǵy josparlar týraly aıtyp, JEO-2-de jetinshi qazannyń qurylysy jáne JEO-BAÚS-da №1 qazandy rekonstrýksııalaý boıynsha aǵymdaǵy jumystar týraly habardar etti.
Aıta keteıik, JEO-2-de jetinshi qazannyń qurylysyn 2023 jyldyń kúzinde aıaqtaý josparlanǵan, bul jobany iske asyrý aldaǵy ýaqytta elektr stansııasynyń qýatyn arttyrýǵa múmkindik beredi.
Sondaı-aq vedomstvo ókilderi JEO-BAÚS-daǵy jańa tútin murjasynyń salyný barysyn tekserdi. Salynyp jatqan qubyrdyń jalpy bıiktigi 150 metr, búginde 75 metr salyndy. Qurylys jumystary 2021 jyly bastaldy, jańa qubyrdyń qurylysyn osy jyldyń qyrkúıek aıynda aıaqtaý josparlanǵan.
Kásiporyn mamandarynyń aıtýynsha, jańa qubyrdy paıdalanýǵa berý jumys istep turǵan qubyrǵa júktemeni azaıtýǵa, qubyrǵa josparly tekserý men qoldanystaǵy tútin qubyryna kúrdeli jóndeý júrgizýge múmkindik beredi.
Sondaı-aq Mınıstrlik ókilderi «KazEnergoMash korporasııasy» JShS zaýytynda bolyp, onda Petropavl JEO-2 qazandaryna kúrdeli jóndeý júrgizý úshin qajetti qosalqy bólshekterdi daıyndaýǵa baǵyttalǵan jumystardyń oryndalý barysymen tanysty.