17 sáýir kúni besinshi Almaty jartylaı marafony ótti, dep habarlaıdy Egemen.kz.
Marafon tańǵy saǵat 8-de Tuńǵysh Prezıdent saıabaǵynda bastady. 5500-ge jýyq áýesqoı sportshy qala kóshelerimen Ortalyq stadıondaǵy márege qaraı júgirdi.
Sórede barlyq qatysýshylardy Almaty qalasy ákiminiń orynbasary Arman Orazbaıuly Qyryqbaev quttyqtady. Jarystyń bas dárigeri Orazbek Sahov, bas seriktes – Onlinebank ókili Dáýren Sartaev jáne jarys dırektory Saltanat Qazybaeva tilek sózderin aıtty.
Tańǵy saǵat 8-de sóreden birinshi bolyp 10 km-ge qatysýshylar men skandınavııalyq júris ókilderi shyqty. 8:32-de márege osy qashyqtyqtyń jeńimpazy Denıs Stepanenko keldi. Áıelder arasynda 10 km-de alǵashqy bolǵan – Ekaterına Grısaı.
Saǵat 8:20-da jartylaı marafonshylar – áýesqoı sportshylar, estafeta qatysýshylary, sondaı-aq kásipqoı jeńil atletter, jartylaı marafonnan (21,1 km) Qazaqstan chempıonatynyń qatysýshylary sórege shyqty.
Jartylaı marafonshylardyń arasynan máre syzyǵyna birinshi bolyp jetken halyqaralyq deńgeıdegi jeńil atletıkalyq sport sheberi Rınas Ahmedeev boldy. Onyń máre ýaqyty - 1 saǵat 5 mınýt jáne 11 sekýnd, jáne de bul kórsetkish Almaty jartylaı marafony jol baǵytynyń absolıýttik rekordy.
1:06:57 nátıjesimen júgirip kelgen Kelmanov Rakymjan Qazaqstan Respýblıkasy Chempıony ataǵyna ıe boldy.
Áıelderdiń arasynan márege birinshi bolyp jetken Taldyqorǵan qalasynan Madına Kerımova boldy. Sondaı-aq ol 1 saǵat 18 mınýt 52 sekýnd ýaqytymen jartylaı marafonnan Qazaqstan Respýblıkasy Chempıony atandy.
Estafeta komandalarynyń arasynda JRun júgirý mektebiniń komandasy jeńiske jetti.