Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın «Zerde» holdıngin reformalaýdyń tıimdi tásilderi iriktelip jatqanyn habarlady, dep jazady Egemen.kz.
«Reformalaý týraly aıtsaq, Memleket basshysy naqty tapsyrma berdi. Endi sonyń joldaryn qaraımyz. Eń tıimdi degenin Úkimetke usynamyz», dedi Baǵdat Mýsın.
Mınıstrdiń aıtýynsha, reformalaý máselesi keshendi aýqymda qaralyp jatyr.
«Esep komıteti holdıngtiń 2016-2018 jyldardaǵy jumysyna taldaý jasady. Keıingi bir jylda holdıngtiń quramyndaǵy kompanııalardyń tıimdiligin arttyrý baǵytynda jumys istedik. Tıimdiliktiń óskenin sandar kórsetip tur. Eger Esep komıteti nusqaý berse, qaıta otyryp, «Zerde» holdınginiń jumysyn tıimdi etý, reformalaý máselelerin qarastyramyz. Qazaqstanda sıfrlandyrýmen 10-15 kompanııa aınalysady. Bul jumysqa túrli kompanııalardyń qatysýy bizdi jigerlendire túsedi. О́ıtkeni árqaısysynyń óz pikiri bar. Árqaısysy óz jumysyn isteıdi», dedi Baǵdat Mýsın.
Eske sala ketsek, Qasym-Jomart Toqaev «Zerde» holdıngin reformalaý týraly tapsyrma bergen edi.