Búgin Ulttyq bıotehnologııa ortalyǵynda túrli tereń jaralar men kúıikterdi emdeýge arnalǵan ınnovasııalyq qural tanystyryldy, dep habarlaıdy Egemen.kz.
Qazaqstandyq ǵalym V.B.Ogaı jýrnalısterge jaralar men kúıikterdi emdeýge arnalǵan ǵylymı ázirleme - X-Graft bıologııalyq jabyndy tanystyrdy.
«Tańý materıaly tereń jáne uzaq emdelmeıtin jaralardy emdeýge arnalǵan, ol sondaı-aq trofıkalyq jaralardy ýaqytsha tańý úshin de qoldanylady. Emdik qasıetteri boıynsha bul bıologııalyq jabyn sheteldik analogtardan kem emes, sebebi ol kollagen men elastınniń tabıǵı talshyqtarynan jasalǵan. Sondaı-aq jabyndy stomatologııada qyzyl ıektiń kólemin ulǵaıtýǵa jáne tis ımplantynyń aınalasyndaǵy jumsaq tinderdiń kólemin arttyrý úshin qoldanýǵa bolady», dedi V.B.Ogaı.
DDU málimetteri boıynsha jylyna 180 000 adamnyń ólimine túrli kúıikter sebep bolady. Qazirgi ýaqytta álemde Alloderm, He-Derma, Integra jáne Dermagraft sııaqty allogendik jáne ksenogendik bıologııalyq jaralardy tańý arqyly kúıikterdi emdeýdiń zamanaýı ádisteri keńinen qoldanylyp keledi.
Búgingi tańda bıologııalyq jabyn Qaraǵandy qalasyndaǵy professor H.J.Maqajanov atyndaǵy kóp salaly aýrýhanada jáne Almaty qalasynyń №4 klınıkalyq aýrýhanasynda klınıkalyq zertteýlerden sátti ótip, oń nátıjesin kórsetti.
Zertteýge jarasynyń kólemi 5-30%, II – III AB dárejeli kúıikteri bar 120 naýqas qatysty. Zertteý nátıjeleri boıynsha qarapaıym dáke tańǵyshtarymen salystyrǵanda bıologııalyq jabyn saýyǵý prosesin edáýir jyldamdatty. Ol jaranyń betine zaqym keltirmeı, neovaskýlıarızasııa men reepıtelızasııaǵa baılanysty zaqymdalǵan teriniń fýnksıonaldy qalpyna tez kelýine yqpal etti.
«Bizdiń «X-Graft» bıologııalyq jabyndy medısınalyq qural retinde Qazaqstan men EAEO elderinde memlekettik tirkeýden ótip, klınıkalyq tájirıbege engizilgen soń, elimizdegi medısınalyq qyzmetter deńgeıi kóterilip, naýqastardyń da ómir súrýi jeńildeıdi. Sonymen qatar aýqymdy jáne tereń kúıikteri bar naýqastar óliminiń sany áldeqaıda tómendeıdi dep oılaımyz», dedi V.B.Ogaı.
Atalǵan joba QR BǴM, QR SDIAО́M, «О́nimdi ınnovasııalardy yntalandyrý» baǵdarlamasy men Dúnıejúzilik banktiń qoldaýymen júzege asyrylýda. Qural qazirgi kezde klınıkalyq synaqtardan ótip, Qazaqstanda tirkelý satysynda.