Elorda ákimdigi kóppáterli turǵyn úı keshenderi qurylysynyń ornyna áleýmettik nysandar men qoǵamdyq keńistikter - gúlzarlar, jelekjoldar, aýlalar salý boıynsha birqatar sheshim qabyldady, dep habarlaıdy Egemen.kz.
Osy baǵytta ákimdik qyzmetkerlerimen, onyń ishinde aýdandyq ákimdiktermen jáne qurylys salýshylarmen kezdesýler, talqylaýlar ótedi.
«Aıta ketý kerek, qabyldanǵan sheshimder tek núkteli qurylys týraly másele qozǵalǵanda ǵana qaıta qaralady. Sebebi qalanyń bas josparyna sáıkes yqsham qurylysqa ruqsat etiledi. Sondyqtan áleýmettik nysandar men qoǵamdyq keńistikter tapshylyǵy bar aýmaqtarda turǵyn úı keshenin salý týraly qurylys salýshylardyń usynysy qabyldanǵan joq», dep jazdy elorda ákimdiginiń resmı saıty.
Ondaǵy derekterge súıensek, qaladaǵy Baıtursynov kóshesi, 7 jer ýchaskesinde kóppáterli turǵyn úı kesheniniń ornyna mektep salynady. Budan bólek, Qoshqarbaev dańǵyly men Aqyrtas kóshesi mańynda oqýshy oryndarynyń tapshylyǵyn azaıtý úshin jalpy bilim beretin taǵy bir mektep salynady. Sol sııaqty Aqbulaq yqshamaýdanyndaǵy Q. Jalaıyr kóshesinde «Iconic» turǵyn úı kesheniniń qurylysy toqtatylǵan. Onda master-jospar boıynsha gúlzar salynady.
«Esil aýdany boıynsha Máńgilik El dańǵylyndaǵy №9 emhana men №77 mektep-gımnazııa arasyndaǵy ýchaskede serýendeý jáne demalý úshin qoǵamdyq keńistik ashylady. Kúmisbekov kóshesi, 9 mekenjaıyndaǵy 21 qabatty turǵyn úı kesheni men parkıngtiń ornyna qoǵamdyq keńistik pen gúlzar salynady. M.Gorkıı – Kosygın – Chelıýskınsev – Ishımskaıa kósheleriniń kvadratynda turǵyn úı kesheniniń ornyna gúlzar paıda bolady. Sonymen qatar Bas prokýratýra men Jysan Bank ǵımarattary arasyndaǵy Máńgilik El dańǵyly men Syǵanaq kóshesiniń qıylysynda ornalasqan aýmaqta kóppáterli turǵyn úı kesheniniń ornyna taǵy bir mektep turǵyzylady», delingen habarlamada.
Jarııalanymda elordanyń jelilik parkinde turǵyn úı qurylysy bolmaıtyny, ıaǵnı «Abý Dabı Plazadan» bastap botanıkalyq baqqa deıin jelilik parktiń barlyq tusynda kóppáterli turǵyn úı kesheni salynbaıtyny aıtylǵan. «Caspian Palace» TK men «Palazzo degli Affari» bıznes ortalyǵy arasyndaǵy aýmaqta Syǵanaq, Á.Bókeıhan, Kereı-Jánibek handar kósheleri jáne Máńgilik el dańǵyly kvadratyndaǵy «Qalalyq romans» TK mańynda buryn josparlanǵan qurylystyń ornyna mektep bolady. Jer – qurylys salýshynyń jeke menshigi.
«Buqar jyraý jáne Á.Bókeıhan kósheleriniń qıylysyndaǵy Aqnıet kóshesiniń boıynda jalpy bilim beretin mektep, balabaqsha men býlvar ornalastyrý qarastyrylǵan. Jer – qurylys salýshynyń jekemenshigi, buryn turǵyn úı kesheniniń qurylysy josparlanǵan. Qabanbaı batyr dańǵylyndaǵy Kereı, Jánibek handar jáne Orynbor kósheleriniń arasyna medısınalyq ortalyq salynady. Joǵaryda atalǵan barlyq jobalar boıynsha egjeı-tegjeıli josparlaý jobasyna ózgerister engizý boıynsha ákimshilik prosester júrgizilip jatyr», dep atap ótken ákimdik.