Senattyń jalpy otyrysynda «QR Úkimeti men Túrki akademııasy arasyndaǵy Túrki akademııasyn ornalastyrýdyń sharttary men tártibi týraly kelisimdi ratıfıkasııalaý týraly» Zań qabyldandy, dep habarlaıdy Egemen.kz.
Akademııanyń basty maqsaty – túrki tilderin, ádebıeti men mádenıetin saqtaýǵa, damytýǵa jáne tanymal etýge baǵyttalǵan túrkologııa salasyndaǵy zertteýlerdi úılestirý. Qazirgi tańda akademııaǵa múshelikke Qazaqstannan basqa Qyrǵyzstan, Ázerbaıjan jáne Túrkııa elderi enip otyr.
«Akademııanyń shtab-páteri Nur-Sultan qalasynda ornalasqanyna baılanysty kelisimniń maqsaty - elimizge jumys isteý kezeńindegi Túrki akademııasynyń mártebesin, onyń artyqshylyqtary men ımmýnıtetterin aıqyndaý», dedi Bilim jáne ǵylym mınıstri Ashat Aımaǵambetov.
Onyń aıtýynsha, akademııada 17 adam jumys isteıdi. Onyń ishinde ekeýi shetel azamaty. «Kelisim kúshine engennen keıin akademııanyń jergilikti jáne sheteldik qyzmetkerleri Syrtqy ister mınıstrliginde akkredıtteýden ótýi tıis bolady. Shetel qyzmetkerleri úshin bul olardyń el aýmaǵynda bolýyna negiz bolyp sanalady.
Akademııa ǵylymı-zertteý jumystarymen, kitaptar men jýrnaldar shyǵarýmen aınalysady, túrki elderiniń ataqty ǵalymdaryna halyqaralyq forýmdar men konferensııalar ótkizýde, túrkologııa boıynsha ǵylymı jumystar júrgizýde, akademııa úlken belsendilik tanytyp keledi. Túrkitildes memleketter uıymyna qatysýshy eldermen yntymaqtastyqty nyǵaıtýdyń jáne Qazaqstannyń túrki álemindegi rólin arttyrýdyń mańyzdylyǵyn nazarǵa ala otyryp, atalǵan zań jobasyn qoldaýlaryńyzdy suraımyn», dedi A. Aımaǵambetov.
Zań jobasyn talqylaý barysynda depýtattar qujatty qabyldaý týraly sheshim qabyldady.