27 myń adam jumyspen qamtylady

Jumys berýshilerdiń arasynda «Sever Ptısa», «Baıan-Sulý», «AgromashHoldıng KZ» jáne Qostanaı traktor zaýyty syndy iri kásiporyndar bar. Aýylsharýashylyq tehnıkalaryn qurastyratyn «AgromashHoldıng KZ» zaýytynyń menedjeri Aıgúl Áýbákirovanyń aıtýynsha, búgingi tańda kásiporynda 50 shaqty jumys orny bos turǵan kórinedi. Al Qostanaı un kombınatynyń ókili Olga Mazkýnova elektrık, santehnık, slesar mamandary men un qaptaýshylardyń jetispeıtinin aıtty. Ká­siporyn joǵarǵy oqý oryndary men kolledj tú­lek­terimen qatar, dıplomsyz jastardy da jumysqa alýǵa daıyn.

Qalalyq jumyspen qamtý ortalyǵynyń basshysy Nadejda Kostenıýktiń aıtýyna qaraǵanda, oblystyń ortalyǵynda 1 170 bos jumys orny bar kórinedi. Munyń syrtynda, jastar «Birinshi jumys orny» baǵdarlamasy arqyly da ózi unatqan jumysyna ornalasa alady.

Jumys orny jármeńkesine oblys ákimi de kelip, is-sharanyń basy-qasynda júrgen kásiporyn ókilderimen, jumys izdep kelgen jas­tarmen kezdesti. Ákimniń aıtýynsha, ke­ıingi jyldary óńirde jastar praktıkasy men «Birinshi jumys orny» jobasyna qa­tysýshylardyń eńbekaqy mólsheri 30 aılyq eseptik kórsetkishke deıin ulǵaıtylyp, túlekterdiń jastar tájirıbesinen ótý merzimi 6 aıdan 1 jylǵa deıin uzartyldy. Jalpy, sońǵy eki jyldyń ishinde jumyspen qamtý baǵdarlamalarynyń kómegimen 18 myń adam jumysqa ornalasqan.

Bıyl oblysta keminde 27 myń adam jumyspen qamtylady dep josparlanyp otyr. Sonymen qatar óńirde iske asyrylyp jatqan ulttyq jobalar men jeke bastamalar aıasynda 18 myń jumys ornyn ashý kózdelip otyr.

Is-sharany uıymdastyrýshylar oblysta qaı salada qandaı maman tapshy ekenin zerdelep, anyqtaý maqsatynda jumys berýshilerden saýaldama alǵan eken. Nátıjesinde, óńirdegi eńbek naryǵynda mehanızator, aýyr júk kóli­gin júrgizýshi, qurylysshy, elektromonter, aspaz sııaqty mamandyqtar úlken suranysqa ıe ekeni anyqtalyp otyr. Buǵan qosa, bilim berý, den­saýlyq saqtaý, mádenıet, sport, taý-ken jáne aýyl sharýashylyǵy salalarynda da maman je­tis­peýshiligi baıqalady.