Túrmeden de tilip jedi

Kúzet qyzmetin kúsheıtýge bólingen 322 mıllıon teńge túgendelmeı jatyr

Bıýdjet qarajatyn kórgen­de jemsaýy búlkildep turatyn qomaǵaılar Atyraýda azaıar emes. Basqasy basqa, qý qulqynnyń qamyn kúıttegender endi túrme­niń kúzetin kúsheıtýge bólingen bıýdjet qarjysyna qol sala bas­tady. Buǵan oblystyq eko­no­mıkalyq qyl­mysqa jáne sybaılas jemqorlyq­­qa qar­sy kúres departamentiniń tú­zeý mekemesindegi jóndeý jumys­ta­ryna jaratylýy tıis bólingen 322 mıllıon teńgeniń urlanǵanyn anyqtaýy aıqyn dálel. Naqtylaı aıtqanda, «Eńbek Atyraý» fılıalynyń dırektory 2013 jyldyń naýryz-jel­toqsan aılary aralyǵynda túr­me­niń ınjenerlik-tehnıkalyq qural­­daryna kúrdeli jóndeý júr­gizýge jáne turǵyn aımaq obek­tilerin oqshaýlaýǵa baı­lanysty Atyraýdaǵy ÝG-157/9 mekemesimen kelisimshart jasaǵan. Alaıda, dırektordyń túpki oıynda túrme­­niń aınalasynan myńdap emes, birne­she mıl­lıondaǵan qarjyny qarpyp qalý jos­pary túzilgen sekildi. Sóıtip, túrme kúzetin kú­sheıtýge jumsalǵan qurylys materıaldarynyń baǵasyn ósirip, jobalyq-smetalyq qujattardy aýystyrý arqyly iri kólemdegi (322 mıllıon teńge) bıýdjet qarajatyn urlaǵan. Qazir atalǵan fakti boıynsha «Eńbek Atyraý» fılıalynyń dırektoryna qa­­­tys­ty Qylmystyq kodekstiń 176-babynyń 3-bóligi­men (senip tapsyrylǵan bóten múlikti ıelenip alý nemese ysyrap etý) qyl­mystyq is qozǵaldy. Bul, árıne, bıýdjet qa­rajatyn atyraýsha urlaý ádisiniń áli de jýyq arada tyıyla qoımaıtynyn baı­qatady. Joldasbek ShО́PEǴUL, «Egemen Qazaqstan». Atyraý oblysy.