Rýdnyıdaǵy kolledj ashanasynyń úsh qyzmetkerinen patogendi altyn stafılokokk anyqtaldy. Bul týraly Sanıtarlyq-epıdemıologııalyq baqylaý komıtetiniń resmı ókili Erjan Baıtanaev óziniń Facebook paraqshasynda jazdy, dep habarlaıdy Egemen.kz.
Aıta keteıik, Qostanaı oblysynda bıylǵy jyldyń 20-21 sáýir aralyǵynda Qostanaı oblysy ákimdigi bilim basqarmasynyń «Rýdnyı taý-ken-tehnologııalyq kolledjiniń» KMK stýdentteri tamaqtan ýlanǵan bolatyn. Juqpaly aýrýlar bólimine barlyǵy 14 adam jatqyzyldy. Atalǵan fakt boıynsha departament pen aýmaqtyq sanıtarlyq-epıdemıologııalyq baqylaý basqarmasynyń mamandary qozǵalǵan qylmystyq is aıasynda kásipkerlik sýbektisi jalǵa alǵan kolledj ashanasyna jospardan tys tekserý júrgizdi.
Epıdemıologııalyq tekserý barysynda naýqastarda júrek aınýy, qusý, suıyq nájis túrindegi belgiler bolǵan, olar kolledj ashanasynda tamaqtanýmen baılanysty ekeni anyqtaldy. Búgingi tańda barlyq stýdentter qanaǵattanarlyq jaǵdaıda aýrýhanadan shyǵarylyp, dárigerlerdiń baqylaýyna alyndy.
Zerthanalyq zertteý nátıjeleri boıynsha ashananyń 3 qyzmetkerinen patogendi stafılokokk anyqtaldy, daıyn ónimniń barlyq úlgileri mıkrobıologııalyq kórsetkishterge sáıkes kelmedi. Aýrýhanaǵa jatqyzylǵan stýdentterdiń taldaýlarynda patogendi altyn stafılokokk anyqtaldy. Infeksııanyń kózi qoǵamdyq tamaqtandyrý qyzmetkerleri bolýy múmkin.
Tekserý barysynda tamaq ónimderin sapasy men qaýipsizdigin rastaıtyn qujattarsyz paıdalaný, saqtaý sharttary men pisirý tehnologııasyn buzý syndy sanıtarlyq erejelerdi buzý faktileri anyqtaldy.
«Mamandar vırýs oshaǵynda profılaktıkalyq jáne epıdemııaǵa qarsy is-sharalar júrgizdi. Tekserý nátıjeleri boıynsha qoldanystaǵy zańnamaǵa sáıkes sharalar qabyldanady», delingen habarlamada.