2022 jyldyń 27 sáýirinde «Myń bala» Ulttyq zııatkerlik olımpıadasynyń II kezeńi bastaldy, dep habarlaıdy Egemen.kz.
27-29 sáýir aralyǵynda (úsh kúnde) I kezeńniń bes myń fınalısti óńirlik testileý ortalyqtary bazasynda matematıkalyq saýattylyq, qazaq tili (oqytý qazaq tilinde júrgiziletin oqýshylar úshin), orys tili (oqytý orys tilinde júrgiziletin oqýshylar úshin), aǵylshyn tili jáne jaratylystaný boıynsha akademııalyq bilimdi baǵalaýǵa arnalǵan kompıýterlik testileýden ótedi.
«Myń bala» olımpıadasy úshinshi jyl qatarynan qabiletti aýyl oqýshylaryn anyqtap keledi. «Myń bala» - aýyldyq jerlerdegi mektep oqýshylarynyń daryny men qabiletin qoldaýǵa, sondaı-aq daryndy balalarǵa arnalǵan mamandandyrylǵan mektepterde oqý úshin akademııalyq qabiletti oqýshylardy irikteýge baǵyttalǵan ulttyq aýqymdaǵy biregeı joba. «Myń bala» Ulttyq zııatkerlik olımpıadasy aýyl oqýshylary úshin bilim berý salasyndaǵy baspaldaqqa aınaldy.
Aýyl mektepterine arnalǵan «Myń bala» Olımpıadasynyń birinshi kezeńi onlaın formatta arnaıy ázirlengen platformada ótkiziledi, onyń ereksheligi - bir ýaqytta 150 myńǵa deıin qatysýshylardyń test ótýge múmkindigi bar.
«Bıyl biz elimizdiń kóptegen aýyldaryn qamtı aldyq. Olımpıadaǵa 146 myńnan astam oqýshy tirkeldi, 132 myńnan astam oqýshy I kezeńniń onlaın testileýine qatysty. Testter keńistiktik jáne logıkalyq oılaý qabiletterin baǵalaýǵa baǵyttalǵan. Olımpıadanyń ortasha ótý baly 5-synypta 347,28, al 6-synypta 347,13 balldy qurady. Elimiz boıynsha joǵary kórsetkishti Qyzylorda, Soltústik Qazaqstan, Jambyl oblystarynyń oqýshylary kórsetti», dedi «Elbasy Akademııasy» KQ dırektory Aslanbek Amrın.
Olımpıada jeńimpazdary kvota boıynsha daryndy balalarǵa arnalǵan elimizdiń jetekshi mektepterine: Respýblıkalyq fızıka-matematıka mektebine, «Bilim-Innovasııa» lıseıine, «Daryn» mamandandyrylǵan mektepterine oqýǵa túsýge múmkindik alady.
«Myń bala» olımpıadasyn «Elbasy Akademııasy» korporatıvtik qory Qazaqstan Respýblıkasy Bilim jáne ǵylym mınıstrligimen seriktestikte birlese ótkizedi.
Aıana Toǵanbek