Qazaqstannyń Qarýly kúshteri UQShU-ǵa múshe eldermen oqý-jattyǵý ótkizýge daıyndalyp jatyr, dep habarlaıdy Egemen.kz.
Bas shtab bastyǵynyń orynbasary – Jedel josparlaý departamentiniń bastyǵy general-maıor Marat Aımashev Ujymdyq qaýipsizdik týraly shart uıymy Birikken shtaby bastyǵynyń birinshi orynbasary general-leıtenant Hasan Kaloevtyń basshylyǵymen ótken alǵashqy shtabtyq kelissózderge qatysty.
Keńeske Armenııa, Belarýs, Qazaqstan, Qyrǵyzstan, Reseı, Tájikstan, UQShU Hatshylyǵy men Birikken shtabynyń ókilderi de qatysty.
Talqylaýǵa negiz bolǵan taqyryp 2022 jylǵa bekitilgen josparǵa sáıkes Uıymǵa múshe elderdiń Ortalyq Azııa óńirinde birlesken oqý-jattyǵýlaryn ótkizý boldy.
«Bıylǵy jyldyń qazan aıynda Qazaqstan aýmaǵynda Jedel den qoıý ujymdyq kúshteriniń «О́zara is-qımyl – 2022» komandalyq-shtabtyq oqý-jattyǵýlary, barlaý kúshteri men quraldarynyń «Izdeý – 2022» arnaıy oqý-jattyǵýy jáne materıaldyq-tehnıkalyq qamtamasyz etý bólimsheleriniń «Eshelon – 2022» arnaıy oqý-jattyǵý ótedi», delingen Qorǵanys mınıstrliginiń baspasóz habarlamasynda.
Ortalyq Azııa óńiriniń Jedel óristetý ujymdyq kúshteriniń «Shekara – 2022» birlesken oqý-jattyǵýyn Tájikstan aýmaǵynda ótkizý josparlanyp otyr. Sonymen qatar Qyrǵyzstanda bitimgershilik bólimsheleriniń «Myzǵymas baýyrlastyq – 2022» komandalyq-shtabtyq oqý-jattyǵýy ótetinin aıta ketken jón.
Is-sharalar UQShU Ujymdyq qaýipsizdik júıesiniń maqsaty boıynsha tapsyrmalardy oryndaýǵa daıyndyǵyn arttyrýǵa baǵyttalǵan.