Qostanaıda Qazaqstan halqynyń birligi kúnine oraı uıymdastyrylǵan merekelik is-sharalar aıasynda ulttyq qolóner buıymdarynyń kórmesi ótti. Etnokórmede Tobyl óńirinde tatý-tátti turyp jatqan túrli ult ókilderiniń tól mádenıeti men turmys-saltynan kórinis beretin mýzyka aspaptary, toqyma buıymdary, sándik áshekeıler men qarapaıym turmysqa qajet usaq-túıek zattar sórege qoıyldy.
Kórmedegi zattardyń árqaısysy ár alýan ulttyń turmysy men mádenı tanym-tabıǵatyna saı erekshe oıýymen kóz tartyp ózgeshelengenimen, bárin bútindeı alǵanda Qazaqstanda turyp jatqan kóp ulttyń búgingi beıbit tynys-tirshiligi men yrys-yntymaǵy jarasqan jarqyn kelbetin aıǵaqtap turǵandaı.
Etnokórmeni tamashalaýǵa kelgen jurttyń birazy ózderi qalaǵan qolóner buıymdaryn satyp alyp, oǵan avtordyń qoltańbasyn qoıdyrdy. Uzyn bir qatar bolyp tizilgen kórme sóreleriniń birinen óńirge belgili aǵash sheberleri Qabdil-Májıt Imanov pen Tańatqan Bojaqovtardyń týyndylary oryn alypty. I.Omarov atyndaǵy qazaq drama teatrynyń beldi ártisi ári jarty ǵasyrǵa jýyq ýaqyttan beri dombyra jasap, bul ónerin turaqty kásipke aınaldyrǵan Qabdil-Májıt aǵa keıingi jyldary ulttyq aspapqa degen suranys kóbeıip kele jatqanyn aıtty. Jurt Tańatqan aǵa jasaǵan aǵash ydystardy da baǵasyna kelisip áketip jatty.
– Kókterek sekildi sapaly aǵashtan jonylǵan ydysta turǵan as dámin joǵaltpaıdy ári kópke deıin buzylmaı saqtalady, – deıdi usta.
Al Nıkolaı Berdnıkov aǵashtan jasalǵan kúntizbe, maılyq salǵysh, túrli músinshelerin saýdaǵa shyǵarypty. Oǵan qarama-qarsy ornalasqan Irına Shýrýpova toqyma qýyrshaq jasaýmen aınaldysady. Jumsaq qýyrshaqtardyń baǵasy 2 jarym myń teńgeden bastalyp, 17 myń teńgege deıin jetedi eken.
– Kóz maıyn taýsyp bir qýyrshaqty toqyp shyǵý úshin birtalaı ýaqyt ketedi. Asqan tabandylyqty qajet etetin óte kúrdeli jumys. Kúrdeli bolatyn sebebi qýyrshaqtyń kólemine emes, toqý ádisine, túrli bólshekterine baılanysty, – deıdi ismer.