Syrtqy ekonomıkalyq jaǵdaı saldaryn jeńildetý úshin bıyl ekonomıkanyń naqty sektoryna 1,2 trln teńge bólý josparlanǵan. Bul týraly búgin Premer-Mınıstr Álıhan Smaıylovtyń Reformalar jónindegi joǵary keńes tóraǵasynyń orynbasary Ser Sýma Chakrabartımen kezdesýinde aıtyldy, dep habarlaıdy Egemen.kz primeminister.kz saıtyna silteme jasap.
Keńes barysynda Qazaqstannyń makroekonomıkalyq damýy, «Astana» halyqaralyq qarjy ortalyǵynyń qyzmeti, sondaı-aq ınvestısııalar tartý máseleleri talqylandy. Máselen, qazirgi ýaqytta jahandyq jáne óńirlik logıstıkalyq tizbekterdiń buzylýy, álemdik qarjy jáne shıkizat naryqtarynyń qubylýy, ınflıasııalyq qysymnyń kúsheıip bara jatqany atap ótildi.
Yqtımal syn-tegeýrinderdi jeńildetý úshin QR Úkimeti qarjy júıesiniń turaqtylyǵyn qamtamasyz etýge, ınflıasııany baqylaý men tómendetýge, syrtqy saýda qyzmetin yntalandyrýǵa, ekonomıka salalaryn qoldaýǵa jáne ınvestısııa tartýǵa baǵyttalǵan daǵdarysqa qarsy sharalardy qabyldap jatyr.
Kúrdeli syrtqy ekonomıkalyq jaǵdaıdyń saldaryn jeńildetý maqsatynda ekonomıkanyń naqty sektory úshin 2022 jylǵa 1,2 trln teńge bólý kózdelgen. Bul qarajat óńdeý ónerkásibin qoldaýǵa, AО́K-ti, kúre joldardy damytýǵa, kásipkerlerdiń nesıeleri boıynsha syıaqy mólsherlemesin sýbsıdııalaýǵa, kepildendirýge jáne taǵy basqasyna baǵyttalady.
Ser Sýma Chakrabartı bulardyń bári tıimdi ári ýaqytyly sharalar ekenin atap ótti. Onyń aıtýynsha, qazirgi trendterdi ǵana emes, olardyń uzaqqa sozylatyn saldaryn da eskerý mańyzdy. Sonymen qatar keńes barysynda AHQO-nyń 27-29 maýsym aralyǵynda aımaqtaǵy eń iri qarjy konferensııalardyń biri – Astana Finance Days-ti ótkizý josparlary talqylandy. Onyń aıasynda kórnekti halyqaralyq sarapshylardyń qatysýymen Qazaqstannyń jańa ekonomıkalyq reformalaryn, ınvestısııalyq múmkindikteri men áleýetti ósý núktelerin talqylaý josparlanǵan.
Budan bólek kezdesýde Qazaqstanǵa tikeleı sheteldik ınvestısııalardy tartý máselesi talqylandy. Máselen, 2021 jyldyń qorytyndysy boıynsha respýblıkanyń ınvestısııalar tartýdyń «pandemııaǵa deıingi» deńgeıine oralǵany atap ótildi. О́tken jyly quny 3,6 mlrd dollar bolatyn 44 jańa ınvestısııalyq joba paıdalanýǵa berildi.
Qazirgi ýaqytta 54 mlrd dollarǵa otandyq jáne sheteldik ınvestorlardyń iske asyrylǵan jáne josparlanǵan 761 jobasynyń pýly ázirlenip, jarııalandy.
«Qazaqstannyń ınvestısııalyq tartymdylyǵyn arttyrý úshin Úkimet Investısııalyq saıasattyń 2026 jylǵa deıingi jańa tujyrymdamasyn bekitý boıynsha jumys júrgizip jatyr. Jahandyq trendterdi eskere otyryp, tereń óńdeý ónerkásibine, agroónerkásiptik keshenge, farmasevtıkaǵa jáne kólik-logıstıka ınfraqurylymyna ınvestısııalar tartý jumysy jalǵasady», dedi kezdesýdi qorytyndylaǵan Premer-Mınıstr.