Premer-Mınıstrdiń orynbasary – Syrtqy ister mınıstri Muhtar Tileýberdi Majarstannyń Syrtqy ekonomıkalyq baılanystar jáne syrtqy ister mınıstri Peter Sııartomen kezdesti. Keńeıtilgen quramdaǵy kelissózderden keıin vedomstvo basshylary jýrnalısterge suhbat berdi.
«Majar dostarymyzdyń elimizge sapary Qazaqstan men Majarstan arasyndaǵy dıplomatııalyq qarym-qatynastardyń 30 jyldyq mereıtoıymen tuspa-tus kelýiniń sımvoldyq máni zor. Majarstan – táýelsizdigimizdi alǵash tanyǵan álemdegi alǵashqy 10 eldiń biri. 1992 jyly 2 sáýirde memleketterimiz dıplomatııalyq qarym-qatynas ornatty.
Qazirgi tańda Majarstan – elimizdiń jaqyn odaqtasy, Ortalyq jáne Shyǵys Eýropa óńirindegi elder ishinde bizben strategııalyq áriptestik ornatqan birden-bir memleket. Majar halqynyń bizben baýyrlas ekeni, majar dalasy qypshaqtarǵa qutty meken bolǵany barshańyzǵa málim», dedi M.Tileýberdi.
Syrtqy ister mınıstri óz sózinde kelissózder barysynda ashyqtyq pen ózara túsinistik ornaǵanyn atap ótti. Saýda-ekonomıkalyq jáne mádenı-gýmanıtarlyq salalardaǵy Qazaqstan-Majarstan baılanystary talqylanǵanyn jetkizdi. Jahandyq jáne óńirlik kún tártibiniń kókeıkesti máseleleri boıynsha pikir almasqanyna ekpin berdi.
Qazaqstannyń Majarstanǵa eksportyn ártaraptandyrý maqsatynda munaı-gaz óńdeý, metallýrgııa, hımııa, qurylys jáne azyq-túlik ónerkásibi ónimderimen qamtamasyz etýge daıyn ekenimizdi bildirdik. 2005 jyldan beri Qazaqstan ekonomıkasyna Majarstannan 269 mln dollar kóleminde tikeleı ınvestısııalar tartyldy jáne bul kórsetkish jyldan jylǵa ósip keledi. Otandyq naryqta MOL, Gedeon Richter, Egi jáne taǵy da basqa iri majar kompanııalary jumys isteıdi», dedi mınıstr.
Vedomstvo basshysynyń aıtýynsha, ınvestısııalyq jobalar energetıka, onyń ishinde jańartylatyn energııa kózderi, munaı jáne gaz, aýyl sharýashylyǵy, farmasevtıka, kólik pen logıstıka sııaqty mańyzdy salalarda iske asyrylyp keledi. Astana halyqaralyq qarjy ortalyǵynyń alańynda óz ókildikterin ashý múmkindigin qarastyryp otyrǵan Majarstan kompanııalarynyń sany artyp otyr.
«Ekijaqty yntymaqtastyqtyń mańyzdy elementteriniń biri – bilim salasy. Qazirgi tańda Majarstanda elimizdiń bir myńǵa jýyq stýdenti bilim alady. Bul maqsatta dostas memleket jyl saıyn 250 grant bólip otyr. Majar tilinde bilim alýǵa qyzyǵýshylyq tanytatyn stýdentterdiń sany artyp keledi. Majar joǵary oqý oryndarynda qazaq tilin úırenip júrgen majar stýdentterine de rızamyz. Bul jastardyń keleshekte elderimizdi baılanystyratyn «jandy kópirge» aınalatynyna kúmán joq», dep sózin túıindedi M.Tileýberdi.
О́z sózinde Peter Sııarto Majarstannyń Qazaqstannan ımporttaıtyn munaı kólemi artqanyna nazar aýdardy. Onyń aıtýynsha, eldegi «qara altynǵa» qajettiliktiń 65 paıyzy Reseıden keledi. Munyń basty sebebi shetelden munaı satyp alýdyń jalǵyz joly ekeninde jatyr.
Keıingi kezde Qazaqstannan munaı satyp alý kólemin de kóbeıttik. Qazirgi tańda biz tutynatyn munaıdyń 16 paıyzy Qazaqstannan keledi. Bul kólem de Reseı arqyly biriktirilgen munaı qubyrymen jetedi. Bul másele túbegeıli ulttyq múddemizge saı qaralyp jatqanyn atap ótkim keledi. Bul týraly Batystyń nemese Shyǵystyń ne oılaıtyny mańyzdy emes. Biz úshin jalǵyz másele mańyzdy, ol – Majarstandy energııamen qamtamasyz etý», dedi Peter Sııarto.