Tótenshe jaǵdaılar mınıstrliginiń avıaparki jańa tikushaqpen tolyqty. Tikushaqtyń qurylǵylary fransýzdyq «Airbus Helicopters» zaýytynda jasalǵan, dep habarlaıdy Egemen.kz.
Al qurastyrý jumystary IIDM «Qazaqstan ınjınırıng» UK» AQ men «Airbus Helicopters» birlesken jobasy – «Eurocopter Kazakhastan Engineering» JShS zaýytynda oryndalǵan. Bul TMD aýmaǵyndaǵy atalǵan tikushaq túrlerin qurastyrý men tehnıkalyq qoldaý kórsetetin jalǵyz óndiris orny.
2022 jylǵy 4 mamyrda H-145 «Airbus Helicopters» jańa tikushaǵynyń tanystyrylymyna Tótenshe jaǵdaılar mınıstri Iýrıı Ilın, IIDM Azamattyq avıasııa komıtetiniń tóraǵasy Talǵat Lastaev, «Qazaqstannyń avıasııalyq ákimshiligi» AQ Bas dırektory Katalın Radý, «Qazaqstan Injınırıng» UK» AQ Basqarma tóraǵasy Temirjan Ábdirahmanov, «Airbus Helicopters» vıse-prezıdenti Tomas Zeman jáne «Eurocopter Kazakhastan Engineering» JShS bas dırektory Bastet Klemans Marı qatysty.
H-145 – qos qozǵaltqyshty Airbus tikushaqtary túrine jatady. Jolaýshy syıymdylyǵy – 9 adamǵa deıin jáne oryn konfıgýrasııasyn jyldam ózgertý múmkindigi bar. Álem boıynsha 1500-den astam atalǵan tikushaq túrleri paıdalanýǵa berilgen jáne jalpy ushý ýaqyty 6 mıllıon saǵattan astam ýaqytty quraıdy. Áýe kóliginiń sapasy álemdik jetekshi óndirýshi kompanııalardyń talaptary men Eýropalyq áýe navıgasııasynyń qaýipsizdik uıymynyń (EASA) ushý jaramdylyq normalaryna tolyǵymen sáıkes keledi.
Tikushaq qalaqshasyndaǵy 5 buranda arnaıy topsalar men sharıkti ishpektersiz qurastyrylǵandyqtan H-145-te ushý kezindegi diril aıtarlyqtaı tómendegen. Bul óz kezeginde jolaýshylardyń jaılylyq deńgeıin arttyryp qana qoımaı, dirildi báseńdetý júıesinen tolyǵymen bas tartýǵa múmkindik berdi. Nátıjesinde paıdaly júk kólemi 150 kelige deıin artty. Qazirgi kúnde H-145 óz klasy boıynsha eń joǵary júk tasymaldaıtyn tikushaq sanalady. Áýe kóligi 2019 jylǵy qyrkúıekte bıiktigi 6 961 metrdi quraıtyn And taýynyń eń bıik shyńy Akonkagýaǵa qondy.
Tikushaqty izdestirý-qutqarý sharalaryna, turǵyndarǵa jedel medısınalyq kómek kórsetý, sanıtarlyq is-sharalardy júrgizý jumystarynda, sondaı-aq orman qoryn kúzetý jáne qorǵaýǵa paıdalaný josparlanyp otyr.
Jańa tikushaqty tıimdi basqarýdy meńgerý úshin TJM avıasııalyq qurylymy – «Kazavıaspas» AQ-nyń ushý jáne tehnıkalyq quramy Germanııada teorııalyq jáne praktıkalyq biliktiligin jetildirdi.
Jalpy aıtqanda, otandyq áýe kemelerin keńinen paıdalaný – elimizdiń qorǵanys-ónerkásiptik keshenin damytýdyń basty faktory bolyp tabylady.
Búginde TJM avıparkin negizinen otandyq jáne sheteldik áýe kemeleri quraıdy. Olardyń qatarynda Airbus EC-145,H-145, H-130 tikushaqtar toby, Mı-8 túrleri men Mı-26T jáne Ka-32 bar.