Nur-Sultanda grek-rım kúresinen qazaqtan shyqqan tuńǵysh Olımpıada jáne álem chempıony, Qazaqstannyń Eńbek Eri Jaqsylyq Úshkempirovti eske alýǵa arnalǵan U20 jastar arasynda halyqaralyq týrnır ótip jatyr. Bul týraly elorda ákimdiginiń resmı saıty habarlady, dep jazady Egemen.kz.
Týrnırdiń ashylý saltanatynda Premer-Mınıstrdiń orynbasary Eraly Toǵjanov, Mádenıet jáne sport mınıstri Dáýren Abaev, Azııa kúres federasııasynyń prezıdenti, Qazaqstan Respýblıkasynyń grek-rım, erkin jáne áıelder kúresinen federasııasynyń basshysy, qazaqtyń dańqty palýany Dáýlet Turlyhanov, Nur-Sultan qalasy ákiminiń orynbasary Berik Jákenov qatysty.
QR Premer-Mınıstriniń orynbasary Eraly Toǵjanov qatysýshylarǵa jyly lebizin bildirip, sáttilik tiledi.
Bozkilemdegi báseke Nur-Sultan qalasyndaǵy J.Úshkempirov atyndaǵy «Jekpe-jek» saraıynda ótip jatyr. О́z kezeginde grek-rım, erkin jáne áıelder kúresinen federasııasynyń basshysy Dáýlet Turlyhanov halyqaralyq týrnırdiń maqsatyn bylaısha túsindirip berdi:
«Mamyr aıynyń 3-5 kúnderi grek-rım kúresinen jastar arasynda halyqaralyq týrnır ótip jatyr. Bul – marqum Jaqsylyq Úshkempirov aǵamyzdy eske alýǵa arnalǵan týrnır. Oǵan Orta Azııanyń tórt memleketi – Qazaqstan, О́zbekstan, Qyrǵyzstan, Tájikstan elderi qatysyp otyr. Bul básekeniń basty maqsaty palýandarymyz halyqaralyq syndarda shyńdalyp, tájirıbe jınap, aıtýly básekelerde el namysyn abyroımen qorǵasa eken deımiz. Bolashaqta qurama komandada deńgeıi joǵary palýandarymyz kóbeıse dep otyrmyz», dedi ol.
Nur-Sultanda ekinshi ret uıymdastyrylyp otyrǵan halyqaralyq týrnırde 150-den asa sportshy 10 salmaq dərejesi boıynsha básekege tústi.
«Shetelden bólek óz elimizdiń 17 óńirinen kelgen sportshylarymyz bozkilemde beldesip jatyr. О́zimizdiń quramaǵa toqtalsam, jaqynda ótken Azııa birinshiliginde kórdińizder, úlken jetistikterge jettik. Aldymyzda Azııa oıyndary kútip tur. Quramamyz úlken daıyndyqpen, jaýapkershilikpen baryp, joǵary nátıjege qol jetkizedi dep senemin», dedi QR MSM Dene shynyqtyrý isteri komıtetiniń tóraǵasy Samat Erǵalıev.