Elimizde jer ýchaskelerin satyp alýǵa qatysty jańa pılottyq joba engizilip jatyr. Bul týraly «Azamattarǵa arnalǵan úkimet» memlekettik korporasııasynyń basqarma tóraǵasy Súıenish Ábdildın málim etti, dep habarlaıdy Egemen.kz.
«Jer ýchaskesin alý prosesin jeńildetý maqsatynda biz kadastrlyq karta ázirledik. Máseleni aldymen qoǵamnyń talqysyna salyp, jurshylyqtyń pikiri eskerildi. Kartada jer ýchaskelerine qatysty barlyq aqparat kórsetilgen. Jyljymaıtyn múliktiń biryńǵaı memlekettik kadastry aıasynda jer ýchaskelerin egov.kz portalynda aýksıon arqyly usyný pılottyq jobasy iske qosyldy», deıdi Súıenish Ábdildın Ortalyq kommýnıkasııalar qyzmetinde ótken baspasóz máslıhatynda.
Basqarma tóraǵasynyń aıtýynsha, pılottyq joba aıasynda alǵashqy jer ýchaskesiniń aýksıony Aqtóbe qalasynda ótti.
«Aqtóbedegi jer ýchaskesi basynda 51 480 teńgeden bastalyp, aýksıon nátıjesinde ol jer 6 647 611 teńgege satyldy. Iаǵnı birneshe ese qymbat baǵaǵa satylyp otyr, túsken paıda memleket qazynasyna jiberiledi. Atalǵan pılottyq jobanyń taǵy bir artyqshylyǵy sybaılas jemqorlyq árekettiń aldyn alady. Sonymen qatar qyzmet kórsetý merzimin jarty jyldan 1 aıǵa deıin qysqartýǵa múmkindik beredi. Odan bólek, jer ýchaskesin satýda ashyqtyqty qamtamasyz etpek. Bıyl maýsymda atalǵan jobany elimizdiń barlyq óńirinde engizý josparlanyp otyr», deıdi korporasııa basshysy.