Nur-Sultan qalasynyń ákimi Altaı Kólginov Instagram paraqshasynda Esil aýdanyn damytý máselesi týraly aıtty, dep habarlaıdy Egemen.kz elorda ákimdiginiń resmı saıtyna silteme jasap.
«Qala turǵyndarymen júıeli túrde kezdesip turamyz. Búgin Esil aýdanynyń turǵyndarymen kezdesip, aýdandy damytý máselesin talqyladyq. Kezdesýimiz ylǵı da «ashyq mıkrofon» formatynda ótedi. Qatysýshylar tolǵandyrǵan saýaldaryn qoıa alady. Suraqtar sol sııaqty áleýmettik jeli arqyly da joldanady.
Kezdesýimiz úsh saǵatqa sozylyp, 200-den asa suraq qoıyldy, usynystar da aıtyldy. Olardy oryndaý boıynsha jospar quramyz. Máselen turǵyn úı-kommýnaldyq sharýashylyǵy, áleýmettik nysandar, joldar, qoǵamdyq keńistikter, ınfraqurylymdyq nysandar salý, gazdandyrý týraly máseleler qozǵaldy. Sol sııaqty apatty jaǵdaıdaǵy úılerdi buzý, jaryqtandyrý, ınternet, avtobýs, kógaldandyrý, tyǵyz salynǵan qurylys sekildi ózge de problemalar aıtyldy», dedi elorda ákimi.
Qala ákiminiń aıtýynsha, Esil – qarqyndy damyp kele jatqan aýdan. Jyl saıyn turǵyndar sany 40 myńǵa artady. Munyń bári qalanyń ınfraqurylymyna aıtarlyqtaı kúsh túsiredi. Osyny eskere otyryp, sońǵy jyldary mektep, medısınalyq ortalyq, áleýmettik baspana, sport nysany, aýlalar jáne t.b. qurylys kólemi aıtarlyqtaı artty.
«Júıeli baǵyttarǵa tolyǵyraq toqtalyp óteıin. Esil aýdanyndaǵy kóshe-jol jelisine túsken kúshti jeńildetý úshin 2 kólik kópiriniń qurylysyn júrgizip jatyrmyz. Uly Dala dańǵylyndaǵy kópirdiń qurylysyn bıyl aıaqtaýdy josparlap otyrmyz. Al Esil ózeni arqyly ótetin Táýelsizdik dańǵylyndaǵy kópirdiń bitý merzimi – 2023 jyl.
Mańyzdy máselelerdiń biri – aýdandy gazdandyrý. Almaty jáne Saryarqa aýdandary tolyǵymen gazdandyryldy. Ol úshin 680 km-den astam gaz taratý jelisi salyndy. Bıyl Esil aýdanynda (Úrker, Shubar, Prıgorodnyı, Telman eldi mekenderi, «Family Village», «Garden Village» shaǵyn aýdany jáne t.b.) osy baǵyttaǵy jumysty bastaımyz. Shubar yqsham aýdanynda gazdandyrýdy jobalaý jumysy júrip jatyr. Aldymen gaz qubyryn, al kelesi jyly kvartal ishindegi jelilerdi salamyz. Munyń bári qala ekologııasyna oń áser etedi. Sol sııaqty aldaǵy ýaqytta qurylys jumystary qarqyndy júretin aýdandardy jylýmen qamtamasyz etý úshin JEO-3 qurylysy jandandy. Qazir jergilikti 3 gaz qazandyǵyn jobalaý jumysy júrip jatyr», dedi Altaı Kólginov.
Sondaı-aq qala ákimi elektr, sý berý qýatyn aldyn ala arttyrý qajet ekenin de aıtty.
«О́tken jyldan bastap sorǵy-súzgi stansııasynyń (SSS-3) qurylysyna kiristik. Nysan osy jyldyń sońyna qaraı ishinara paıdalanýǵa beriledi, al 2023 jyldan bastap jańa SSS-3 jumysynyń qýatyn arttyramyz. Máselen qazir táýligine 300 myń tekshe metr sý tutynatyn bolsaq, SSS-3-tiń qýattylyǵy táýligine qosymsha 100 myń tekshe metrden asatyn bolady. Sondaı-aq káriz tazartý qurylystaryn (KTQ-2), «Araı», «Juldyz» jáne t.b. qosalqy stansııalardy jobalaýdy jáne rekonstrýksııalaýdy júrgizemiz.
Kelip túsken suraqtardy sheshý máselesin qolǵa aldyq. Kezdesýde aıtqanymdaı, problemalardy sheshý qysqa merzimdi, orta merzimdi, uzaq merzimdi bolyp bólinedi. Osyndaı kezdesýlerdi qalanyń ózge de aýdandarynda ótkizemiz. Aýdandardy aralap, turǵyndarmen kezdesýdi ary qaraı da jalǵastyramyz», dep jazdy elorda ákimi.