Memleket basshysy Qasym-Jomart Toqaevtyń Konstıtýsııaǵa ózgerister men tolyqtyrýlar engizý máselelerine qatysty beıneúndeýi kóptiń kókeıindegisin dóp basqan mańyzdy málimdeme boldy.
«Joldaýda aıtylǵan bastamalardyń negizgi maqsaty – saıası júıemizdi túbirimen ózgertý. Bul halyqtyń kóp jylǵy talap-tileginen týyndap otyr. Azamattarymyz memleketti basqarý isine qatysýǵa keń múmkindik berilgenin qalaıdy. Sondaı-aq saıası úderisti túbegeıli demokratııalandyrý qajet dep sanaıdy. Muny tıimdi júzege asyrý úshin Ata Zańymyzǵa ózgerister engizý qajet», degen Prezıdent Konstıtýsııanyń úshten biri halyq qalaǵan ózgerister negizinde reformalanatynyn jetkizdi. Bul – aýqymdy ózgeris, el tarıhyndaǵy asa mańyzdy qadam bolmaq. Barlyq ózgeris pen tolyqtyrýdyń eldiń talap-tilegi arqyly júzege asatynyn jetkizgen Memleket basshysy 5 maýsymda respýblıkalyq referendým ótkizýdi durys dep tapty.
Bul – barlyq reformanyń eldiń pikiri arqyly ǵana qoldanysqa enetinin bildiredi. Sondaı-aq bul bastamalar Prezıdenttiń ókilettilikterin kúsheıtýge emes, yqpaldy Parlament qurý arqyly qoǵam únin eskeretin Úkimetti qalyptastyrýdyń alǵysharty ekeni aıdan anyq. Qalaı desek te aldaǵy ózgerister el tarıhyndaǵy asa jaýapty, mańyzdy kezeń bolary anyq. Sóz júzindegi emes, halyq ıgiligin kóretin, shırek ǵasyrdan astam ýaqytta qol jetkizgen qundylyqtarymyzdy qasterleý arqyly jańa beleske qadam basatyn Jańa Qazaqstannyń bolashaǵy úshin árbirimiz referendýmǵa qatysyp, óz tańdaýymyzdy bildireıik. Bul – bizdiń azamattyq, osy eldiń erteńine alańdaıtyn perzenti retindegi boryshymyz.
Beısen TÁJIBAEV,
Amanat partııasy Túrkistan oblystyq fılıalynyń atqarýshy hatshysy