Ulttyq ekonomıka mınıstri Álibek Qýantyrov jyl basynan beri eldegi kólik óndirisiniń kólemi 5,8%-ǵa artqanyn aıtty, dep habarlaıdy Egemen.kz.
«О́ńdeý ónerkásibinde serpindi ósý úrdisi baıqalýda. Osy jyldyń qańtar-sáýir aılarynda óndiris kólemi 5,8%-ǵa ósti. Barlyq óńir boıynsha oń ósý kórsetkishi tirkeldi. Eń joǵarǵy ósý Almaty qalasynda, sondaı-aq Atyraý jáne Jambyl oblystarynda baıqalýda», dedi Álibek Qýantyrov Úkimet otyrysynda.
Mınıstrdiń aıtýynsha, óńdeý ónerkásibi salalary boıynsha mashına jasaý óndirisiniń 9,4%-ǵa, onyń ishinde kompıýter, elektrondy jáne optıka quraldar jasaýdyń – 19,7%-ǵa, avtomobıl jasaýdyń – 18,6%-ǵa ósýi baıqaldy.
Sondaı-aq qurylys materıaldary – 9,5%-ǵa, plastmassa buıymdary – 14,3%-ǵa, daıyn metall buıymdary – 10,8%-ǵa, farmasevtıka ónimderi – 6,4%-ǵa, kıim óndirisiniń – 13,8%-ǵa ósýi qamtamasyz etildi.
Taý-ken ónerkásibinde óndiris kólemi 4,4%-ǵa ulǵaıdy. Salalar bólinisindegi ósim taý-ken ónerkásibinde qyzmet kórsetýde – 16,9%-dy, gaz óndirýde – 6,4%-dy, shıki munaı óndirýde 5%-dy, ózge de paıdaly qazbalardy óndirýde – 4,2%-dy, metall kenderin óndirýde – 1,8%-dy, kómir óndirýde – 1,7%-dy qurady.
Aıta ketsek, jyl basynan beri Qazaqstan ekonomıkasynyń ósý qarqyny 4,4%-ǵa jetken. Naqty sektordaǵy ósim 5,1%, qyzmet kórsetý salasynda iskerlik belsendilik 3,4%-ǵa deıin ulǵaıǵan.