Almaty oblysyndaǵy Balqash aýdannyń ortalyǵy – Baqanas aýylynda memleket jáne qoǵam qaıratkeri Dinmuhamed Qonaevtyń eskertkishi boı kóterdi. Kúrti granıtinen qashalǵan eskertkish demeýshiler esebinen turǵyzyldy, dep habarlaıdy Egemen.kz.
Taý tulǵanyń ór beınesiniń bıiktigi - 3,30 metr bolsa, tuǵyrynyń uzyndy - 2 metr, jalpy eskertkishtiń tutastaı alǵandaǵy eńsesi – 5,30 metr shamasynda. Bul áıdik músinniń avtory Altaı Beısenov bolsa, sáýletshisi Bekzat Beısenova eken. Baqanas aýylyna eskertkishtiń ashylýyna oraı jergilikti bılik ókilderi, depýtattar, zııaly qaýym ókilderi jáne aýdan jurtshylyǵy jınaldy..
- Halqymyzdyń birtýar perzenti, memleket jáne qoǵam qaıratkeri Dinmuhamed Ahmetuly Qonaevtyń týǵanyna bıyl 110 jyl. Memleket basshysy Qasym-Jomart Kemelulynyń Jarlyǵymen Qapshaǵaı qalasyna Qonaevtyń esimi berildi. Búgin, mine, qazaqtyń aıaýly perzentine úlken qurmet kórsetilip, eńseli eskertkish ornatyldy. Iri tulǵalardyń eren eńbekterin úlgi etip, ulylardy ulyqtaý – basty paryzymyz. Dinmuhamed Qonaevtyń boıyndaǵy ultjandylyq jastarǵa juǵysty bolsyn! Qazaqtyń dara tulǵasynyń eskertkishi qutty bolsyn! – dedi jıynda sóz alǵan Almaty oblysynyń ákimi Qanat Bozymbaev.
О́z kezeginde el adyna shyqqan Dinmuhamed Ahmetulynyń urpaǵy Eldar Asqaruly Qonaev bul kúndi tarıhı kún dep baǵalap, Dımash aqsaqal úshin ata-babasynyń týǵan jeri Baqanastyń, ondaǵy jurtshylyǵynyń jóni men joly árqashan erekshe bolǵanyn atap ótip, halyqtyń nıeti men peıiline áýletteri atynan rızashylyq bildirdi. Sondaı-aq, saltanatty is-sharada sóz alǵan Parlament Senatynyń depýtaty Beıbit Isabaev halyq yqylasy men kóńilinen shyqqan tulǵaǵa degen qurmetti eshkim de, eshqandaı kúshpen toqtata almaıtynyn erekshe atap ótti. Al general-leıtenant Amangeldi Shabdarbaev «Baqanasqa Dımash Ahmetulynyń eskertkishin qoıý Balqash halqynyń armany edi, uzaq kútken arman búgin oryndaldy» dedi.
Eskertkishtiń ashylýy saltanatynan keıin Dinmuhamed Qonaev rýhyna quran baǵyshtalyp, as berildi.