Úzdik ýnıversıtet úlgisi

«Joǵary oqý oryndarynyń Eýropalyq standart reıtıngisi» boıynsha qazaqstandyq 23 JOO-nyń ishinen joǵary baǵalanǵan 5 bilim ordasynyń biri Qaraǵandy memlekettik tehnıkalyq ýnıver­sıteti bolǵany belgili. Oqý or­ny­nyń aımaqtaǵy róli, ǵyly­mı-oqý úderisiniń monı­to­rıngi, oqý úderisin aqparat­tan­dyrý, oqytý sapasyn baǵalaý sııaqty eýropalyq standarttar eskeri­letin bul baıqaýda úzdikter qa­tarynan oryn alý, osy baǵytta keıingi jyldary júrgizilgen san alýan jumystar jemisi. Jańa jetistikpen qanattanǵan baıyrǵy bilim ordasy Elbasy N.Á.Nazarbaevtyń «Qazaqstan joly – 2050: bir maqsat, bir múd­­de, bir bolashaq» atty Jol­daý­yn­­da ǵylym men bilim salasy aldyna qoıylǵan basym mindet­terge baılanysty joǵary oqý or­nyn damytýdyń 2014 jylǵa ar­nalǵan keshendi baǵdar­lama­syn qabyldady. Negizgi baǵyt­tary qatarynda ýnıver­sıtet­tiń ınno­vasııalyq ǵylymı-tehnıka­lyq ke­sheniniń tıimdiligin arttyrý ne­gizinde Germanııa men AQSh-tyń («KBL», «FLUOR») ın­jı­­nı­­rıng­tik kompanııalarymen bir­le­sip halyqaralyq standarttar­dy qurylysqa engizý jóninde jáne halyqaralyq materıaltaný ortalyqtaryn qurý, sonyń negizinde ónerkásiptik ónimdi ser­tıfıkattaýdy uıymdastyrý jobasyn iske asyrý kózdelgen. Sondaı-aq, aımaq ónerkásibiniń ınnovasııalyq damýy boıynsha metan gazyn paıdaǵa asyrý, ken qazbalary qaýipsizdigin qam­ta­ma­syz etý, geologııalyq barlaý, kólik ınfraqurylymy jáne logıstıka ortalyqtary jumysy jetildiriledi. Oblystyń ındýstrııalandyrý kartasynda qarastyrylǵan jobalardy júzege asyrý úshin básekege qabiletti mamandar daıar­laý jalǵasyn tabady. 75 kásiporynmen 2015 jylǵa deıin joǵary jáne joǵary oqý ornynan keıingi bilim berýde 29 mamandyq boıynsha 2984 mamandy maqsatty daıarlaý sharttary jasaldy. Baǵdarlamada mamandardy daıarlaý sapasyn arttyrý úshin «Schneider Elestric» kompanııasymen birlesip jer ústi lazerlik skanerleý zerthanasyn, optıka-talshyqty kabelderdi dánekerleý jóninde oqý ǵylymı-oqý zerthanasyn qurý bar. Dýaldi oqytý máselelerin sheshý úshin mamandar daıarlaýdyń barlyq beıinderi boıynsha bes ǵylymı-oqý-óndiristik birlestigi taǵy sonshasymen tolyǵatyn boldy. Buǵan qosa, taıaý kúnderi ýnıversıtet «Armandastar ordasy» atty elimizdegi eń iri stýdentter úıin paıdalanýǵa berip, júzdegen shákirtti qýantqaly otyr. Aıqyn NESIPBAI, «Egemen Qazaqstan». QARAǴANDY.