Qazaqstan Syrtqy ister mınıstriniń birinshi orynbasary Aqan Rahmetýllın Italııa elshisi Marko Albertıdi qabyldady, dep habarlaıdy Egemen.kz.
Bıyl Qazaqstan men Italııa dıplomatııalyq qatynastardyń ornaǵanyna 30 jyl tolýyn atap ótýde. Yntymaqtastyqtyń úsh onjyldyǵy ishinde elder ekijaqty ózara is-qımyldyń barlyq spektri boıynsha, onyń ishinde saıası, saýda-ekonomıkalyq jáne mádenı-gýmanıtarlyq salalarda tyǵyz baılanys ornatty.
Dıplomattar halyqaralyq kún tártibindegi ózekti máselelerdiń keń aýqymy boıynsha pikir almasty.
Sonymen qatar taraptar ekijaqty ózara is-qımyldy nyǵaıtýǵa degen ózara qyzyǵýshylyqtyń artyp kele jatqanyn atap ótip, úkimetaralyq jáne parlamentaralyq baılanystardy damytýǵa barynsha járdemdesýge kelisti jáne joǵary men asa joǵary deńgeıdegi ózara saparlardy uıymdastyrý jónindegi josparlardy talqylady. Osy turǵyda taraptar Qazaqstan SIM basshysy Muhtar Tileýberdiniń Italııaǵa josparlanǵan saparyna erekshe nazar aýdardy.
Ekijaqty saýdamen jáne Qazaqstanǵa tikeleı ıtalıandyq ınvestısııalar quıylýynyń oń serpinin nazarǵa ala otyryp, osy baǵyttaǵy áriptestikti odan ári tereńdetý qajettigine erekshe nazar aýdaryldy. Italııa Qazaqstan ekonomıkasynyń iri ınvestorlarynyń biri bolyp sanalady. QR Ulttyq bankiniń derekteri boıynsha 2021 jyly Italııadan Qazaqstanǵa tikeleı sheteldik ınvestısııalar kólemi 122,8 mln AQSh dollaryn, al elderimiz arasyndaǵy ózara taýar aınalymynyń kólemi 2021 jyly 9,6 mlrd AQSh dollarǵa (eksport 8,8 mlrd AQSh doll. jáne ımport 0,8 mlrd AQSh dollar) jetti.