Qaraǵandy polıseıleri bir aptanyń ishinde úsh qalanyń turǵyndaryna 50 mıllıon teńgeden astam shyǵyn keltirgen jalǵan bank qyzmetkerleriniń eki tobyn ustady, dep habarlaıdy Egemen.kz polisia.kz saıtyna silteme jasap.
Qaraǵandy qalasynyń polısııasy men qarjy uıymdarynyń ózderin qaýipsizdik qyzmetiniń qyzmetkeri retinde tanystyrǵan adamdardyń alaıaqtyq áreketteriniń kúsheıgeni týraly eskertýlerine qaramastan, bizdiń azamattarymyz belgisiz esepshottarǵa qyrýar qarjy aýdarýdy jalǵastyryp jatyr.
6 mamyrda Temirtaý qalasynyń Eski qalalyq polısııa bólimine 38 jastaǵy turǵyny aryzdanǵan. Respýblıka bankteriniń biriniń «qyzmetkeri» onyń telefonyna 13 kún boıy habarlasyp, jınaq aqshasyn saqtaımyn degen sózimen 11 mıllıon teńgege jýyq aqshany ıemdenip alǵan. Jábirlenýshi mobıldi bankıng arqyly belgisiz shotqa aqsha aýdarǵan.
«Almaty qalasynyń krımınaldyq polısııa qyzmetkerleri arnaıy sharalar barysynda osy qylmysty jasady degen kúdikpen Qaraǵandynyń 31 jáne 27 jastaǵy eki turǵynyn ustady. Jedel izdestirý is-sharalary kezinde er adamdardan birneshe banktiń tólem kartalaryn tapty. Olardyń bireýiniń aty-jóni belgisiz jáne basqa bireýdiń jeke kýáligi. Sonymen birge ustalǵandardyń turǵylyqty jeri boıynsha Qaraǵandy qalasynda da tergeý amaldary júrgizildi. Oqıǵa ornynan olar birneshe tólem kartasyn tapty», deıdi Qaraǵandy oblysy Polısııa departamenti bastyǵynyń orynbasary Ábil Ábildın.
Qaraǵandy oblysynyń PD Kıberqylmysqa qarsy kúres basqarmasynyń qyzmetkerleri turaqty negizde azamattardyń shottarynan aqsha jymqyrýǵa qatysy bar adamdardy anyqtaý jumystaryn júrgizýde. Osyǵan deıin Qaraǵandy oblysynyń Polısııa departamentiniń qyzmetkerleri banktiń kúzet qyzmetimen birlesip, basqa bank kartalaryn da paıdalanyp, jábirlenýshiniń nesıe retinde bergen aqshasyn alyp ketpek bolǵan bir top adamdy quryqtap, polısııaǵa ótkizgen bolatyn.
Tergeý barysynda ustalǵan azamattan 9 mln teńgege jýyq aqsha men túrli bankterdiń jeti tólem kartasy, uıaly telefondar, aqparat tasymaldaǵysh (fleshka) jáne SIM-kartalar, sondaı-aq ınternet-roýterler alyndy. Olardyń shyǵyny shamamen 40 mln teńgeni quraıdy.
Barlyq faktiler boıynsha Qazaqstan Respýblıkasy Qylmystyq kodeksiniń 190-babynyń 3-bóligi (Alaıaqtyq) boıynsha qylmystyq is qozǵalyp, sottyń sanksııasymen kúdiktilerdiń barlyǵy qamaýǵa alyndy. Polıseıler olardyń Qazaqstan aýmaǵynda osyǵan uqsas basqa da alaıaqtyq faktilerine qatystylyǵyn tekserip jatyr. Jalǵan bank qyzmetkerleriniń múlki alynyp, jeti jylǵa deıin bas bostandyǵynan aıyrylýy múmkin.
Aıana Toǵanbek