Buqar jyraý aýdanyndaǵy Petrovka aýylynda kókpardan 23 jasqa deıingi jastar arasynda Qaraǵandy oblysynyń chempıonaty ótti. Atalǵan saıysqa Qarqaraly, Jańaarqa, Osakarov, Buqar jyraý, Aqtoǵaı, Shet jáne Nura aýdandarynan jeti komanda qatysyp, ózara shyn myqtyny anyqtady.
Júlde qory 1 mıllıon 200 myń teńgeni quraǵan tól sporttyń dúbirli dodasynda 100-ge jýyq kókparshy baq synady.
Eki kúnge sozylǵan saıys qorytyndysynda Shet aýdanynyń kókparshylary top jardy. Ekinshi oryn Jańaarqa aýdanynyń komandasyna buıyrsa, úshinshi júldeni Buqar jyraý men Nura aýdandarynyń kókparshylary ózara bólisti. Al chempıonattyń úzdik shabýylshysy bolyp Shet aýdany komandasynyń 18 jastaǵy múshesi Temirlan Tileýbek tanyldy.
Jeńimpaz komandany sońǵy tórt jyl boıynda jattyqtyryp kele jatqan tálimger Jasulan Bohanov jastar arasyndaǵy ulttyq sportqa degen qyzyǵýshylyqtyń artyp kele jatqanyna qýanyshty ekenin aıtady.
– Komanda múshelerin tańdaý kezinde biz eń aldymen eptilik pen batyldyqqa mán beremiz. Sondaı-aq kókparshy tek atqa otyryp qana qoımaı, jylqyny sezinip, komandada oınaı bilýi kerek. Shabandozdar arasynda tolyq túsinik bolǵany jón. Kókparda kimniń «salma» salatyny mańyzdy emes, másele jalpykomandalyq eseptiń nátıjesinde, – deıdi Shet aýdany ujymynyń jattyqtyrýshysy.
Ulttyq jáne at sporty túrleri boıynsha oblystyq «Qaırat» sport mektebiniń dırektory Nurjan Shaıhın bul chempıonattyń óńir qurama komandasyna laıyqty úzdikterdi irikteıtin týrnırge jatatynyn aıtady.
– Jarys qorytyndysynda iriktelgen kókparshylar kelesi jyldyń naýryz aıynda ótetin el chempıonatynda óner kórsetetin bolady. Jalpy, bizdiń kókparshylarymyzdyń múmkindigi joǵary jáne olardyń keleshegi zor, – deıdi N.Shaıhın.
Aıta ketý kerek, atalǵan kókpar dodasyna qazaqtyń belgili kásipkeri, mesenat, Nátige sút fabrıkasynyń basshysy Erlan Áshim demeýshilik etti. Al uıymdastyrýshylar bolsa, kókpardan oblys chempıonatyn jyl saıyn Petrovka aýylynda ótkizýdi uıǵaryp otyr.
Qaraǵandy oblysy,
Buqar jyraý aýdany