Elordadaǵy Dostyq úıinde Nur-Sultan qalasy Qazaqstan halqy Assambleıasy Densaýlyq saqtaý mınıstrliginiń Transfýzıologııa ǵylymı-óndiristik ortalyǵymen birlese otyryp «Qan tapsyr da, adam ómirine arasha tús» aksııasyn ótkizdi.
Donorlar qataryn kóbeıtý maqsatynda uıymdastyrylǵan aksııaǵa talapqa qarsy kórsetkishteri joq, jasy 18-ge tolǵan turǵyndar qatysty. Al is-sharanyń basy-qasynda júrgen azamattar «Bizdiń basty maqsatymyz – ómir úshin kúresip jatqan adamdarǵa qan berip, taǵdyryna arasha bolyp, ómir syılaý», deıdi.
Is-sharaǵa elordalyq QHA músheleri, jastar, eriktiler belsendi qatysty. Qaıyrymdylyq aksııasynyń mańyzyn atap ótken Nur-Sultan qalasy Qazaqstan halqy Assambleıasy hatshylyǵy etnosaralyq qatynastar máseleleri jónindegi bólimniń bas mamany Galına Kobzeva mundaı ıgi is-sharalardy ótkizý dástúrge aınalǵanyn jáne jyl boıy uıymdastyrylatynyn atap ótti. «Azamattardyń densaýlyǵynyń qan óte mańyzdy bóligi bolǵandyqtan, biz óz qalaýymen donor bolýǵa nıet bildirip, qaıyrymdylyq aksııasyna atsalysýǵa kelgen jandarǵa rızashylyǵymyzdy bildiremiz», dedi Galına Vladımırovna.
Atalǵan aksııanyń mańyzdylyǵy týraly aıta otyryp, Densaýlyq saqtaý mınıstrliginiń Transfýzıologııa ǵylymı-óndiristik ortalyǵynyń ókili «Osyndaı qaıyrymdylyq bastamalaryn ótkizý arqyly biz adamdardy meıirimdi bolýǵa jáne jaqyn adamymyzǵa kómek qolyn sozýǵa jol ashamyz. Eń bastysy, donorǵa muqtaj jandardyń tilegi oryndalatyny júrekke jylylyq uıalatady», deıdi.