Aqtaý garnızonyndaǵy áskerı bólimderiniń áskerı qyzmetshileri jalpyulttyq referendýmda óz tańdaýyn jasap, daýys berdi, dep habarlaıdy Egemen.kz Qoǵamdyq kommýnıkasııa ortalyǵyna silteme jasap.
Teńiz jaıaý áskerı brıgadasynda ornalasqan № 61 saılaý ýchaskesi ashylýy memlekettik ánuran aıtýmen esigin ashty. Sap túzegen sarbazdar áskerı bólimniń mádenı demalys ortalyǵyndaǵy saılaý ýchaskesinde elimizdiń jarqyn bolashaǵy úshin daýys berdi.
Qatysýshylardyń basym bóligi alǵash ret daýys bergen. Solardyń biri, 6 aı buryn áskerge Almaty oblysynan shaqyrylǵan Nurdaýlet Nurlybekov.
«Búgin erekshe kún. Sebebi Qazaqstan Respýblıkasynyń azamaty retinde alǵash ret daýys berý quqyǵymdy paıdalanyp turmyn», dedi qatardaǵy jaýynger Nurdaýlet Nurlybekov.
Áskerı bólimde referendým ótkizýge barlyq jaǵdaı jasalǵan. Saılaý jáshikteri men onǵa jýyq daýys berýge arnalǵan kabınalar bar.
«Búgin elimiz úshin tarıhı mańyzdy kún, osy kúni ár sarbaz Otanymyzdyń bolashaǵy úshin ózimizdiń tańdaýymyzdy jasadyq», dedi qatardaǵy jaýynger Arqat Rahysh.