Batys Qazaqstan oblysynda Konstıtýsııalyq referendýmǵa daýys berý úshin 505 saılaý bólimshesi qyzmet kórsetti. О́ńirde barlyǵy 443 myńdaı saılaýshy bolsa,elorda ýaqytymen 16.00.-de barlyq saılaýshynyń 57,70 paıyzy daýys berip úlgerdi, dep jazady Egemen.kz.
Bul batysqazaqstandyqtardyń basym kópshiligi el erteńi úshin jasalatyn saıası ózgeristerge beı-jaı qaramaıdy degen sóz.
Oral qalasynyń ózinde tańnan beri 123 saılaý bólimshesi daýys berýshilerge qyzmet kórsetti. Munyń 104-i ashyq jumys istegen bólimsheler bolsa, 19-y – jabyq mekemelerge arnalǵan oryndar.
Asa jaýapty naýqanǵa barlyq saılaý bólimsheleri tııanaqty daıyndalǵany kórindi. Kóptegen saılaý ýchaskelerinde eń birinshi kelgen saılaýshyǵa, eń egde saılaýshyǵa, eń jas daýys berýshige shaǵyn syılyqtar tabystalǵan.
Mysaly, Oral qalasynyń Abaı dańǵyly boıynda ornalasqan №463 saılaý bólimshesinde ýchaskege eldiń aldy bolyp kelgen Lıýbov Shahotkına, 80 jastaǵy eń egde daýys berýshi Márýa Nurǵalıeva, 18-ge bıyl ǵana tolǵan, daýys berýge alǵash qatysqan Mılana Baqtııarqyzy túrli syı-sııapatqa ıe boldy. Bir qyzyǵy, shaǵyn da bolsa shattyq syılaıtyn osynaý sııapatty Lıýbov Fılıpqyzy jyl saıyn alady eken.
Jańarǵan referendým úshin daýys berýge Qazaqstan Musylmandary Dinı basqarmasynyń Batys Qazaqstan oblysyndaǵy ókil ımamy Baqytjan Quralbaıuly eleń-alańnan otbasymen birge barypty. Jaqynda ǵana Qadyr Myrza Álı aqynnyń esimin ıelengen №47 orta mektepte ornalasqan №400 saılaý bólimshesinde Quralbaılar otbasy ári jańa Qazaqstan úshin tańdaý jasap, ári sý jańa «Tefal» sháınegin syılyqqa alyp qaıtty. Aıta keteıik, dál osy ózgeristerge ımam Baqytjan Quralbaıulynyń jeke úlesi de bar: qańtardaǵy dúrbeleńde Oraldyń ortalyq alańynda shıryqqan toptyń aldyna shyǵyp, salmaqty da salıqaly sózimen kópshilikti sabyrǵa shaqyrǵan bolatyn. О́zge óńirlerdegideı istiń nasyrǵa shappaýyna, halyq narazylyǵy qaqtyǵys-qantógissiz aıaqtalýyna Baqytjan ımamnyń sol sóziniń de áseri bolǵany anyq.
Saılaý kúni Oral qalasynyń halyq kóp júretin kósheleri men alańdarynda konsertter qoıylyp, kóńildi án-dýman ótip jatty. Osynyń bári saıası naýqanǵa merekelik sıpat berip turdy. Oblys ortalyǵyndaǵy №463 saılaý ýchastoginde baıqaýshy bolǵan Afıza Semǵalıeva da daýys berýshilerdiń belsendiligin, tańdaý jasaýǵa kóterińki kóńil kúımen kelip jatqanyn aıtty.
«Búgin elimiz úshin tarıhı kún. О́zgeristerge toly kezeńge aıaq bastyq. Oral qalasyndaǵy №45 mektep ýchaskesine daýys berýge barǵan kezde baıqaǵanym – halyqtyń belsendiligi kúshti, sondaı bir shynaıy, ózindik yntamen daýys berip jatyr. Asyǵystyq, májbúrlik baıqalmaıdy. Ýchaskedegi tazalyq, mádenıettilik, bir sózben aıtqanda uıymshyldyq kórinip tur. Adam qoǵamnan tys ómir súre almaıdy. Qalaı bolǵanda da, bizdiń árqaısymyz qoǵamnyń bir bólshegimiz. Sondyqtan árqaısymyzdyń búgingi bergen daýsymyz mańyzdy. Osyndaı tarıhı kezeń bizdiń taǵdyrymyzǵa buıyrǵan eken. Sol úshin de baqyttymyz. Men búgin úlken ózgeristerge daýys berdim!» deıdi «О́rleý» BAUO» AQ fılıaly Batys Qazaqstan oblysy boıynsha pedagogıkalyq qyzmetkerlerdiń biliktiligin arttyrý ınstıtýty dırektory Sofııa Izmuhambetova.
Bul kúni Batys Qazaqstan oblysynyń ákimi Ǵalı Esqalıev te el Konstıtýsııasyna ózgerister men tolyqtyrýlar engizý jónindegi respýblıkalyq referendýmda daýys berýge qatysty. Al Ahmet Baıtursynov atyndaǵy №10 orta mektepte ornalasqan №421 saılaý ýchastoginde alǵash daýys bergen Nurasyl Qazybekuly kámelet jasyna tolǵanyna jarty jyl bolsa da, búgin ózin tolyqqandy azamat retinde sezingenin aıtady. Biz kezdesken saılaýshylardyń bári de Jańa Qazaqstannyń keleshegi úshin óz erkimen tańdaý jasaýǵa kelgenin bildirip jatty.