Elordada «Kók aspanym – kók týym» merekelik gala-konserti bolyp ótti. Memlekettik rámizderdiń 30 jyldyq mereıtoıyna arnalǵan aýqymdy is-sharany «Roza Baǵlanova atyndaǵy «Qazaqkonsert» memlekettik konserttik uıymy usyndy, dep jazady Egemen.kz
«Altyn kún aspany, altyn dán dalasy» dep Memlekettik gımnnen bastaý alǵan «Kók aspanym – kók týym» gala-konserti kórermenniń zor yqylasyna bólendi.
Merekelik konsertke arnaıy kelgen Memlekettik Eltańbanyń avtory belgili arhıtektor Jandarbek Málibekov jınalǵan qaýymdy merekemen quttyqtap, uıymdastyrýshylarǵa óziniń alǵysyn bildirdi.
«Men barsha qazaqstandyqtardy búgingi merekemen quttyqtaımyn! Kók baıraǵymyz jelbirep, Eltańbamyzdy álem tanyp, Ánuranymyz asqaqtaı bersin! Búgingi merekelik konsert formaty, qurylymy, mazmuny jaǵynan erekshe boldy. Jańa Qazaqstandy qurýǵa baǵyt alǵan elimizge osyndaı rýhanı-tanymdyq jobalar árdaıym qajet. Jańa oı salatyn, zamanymyzdy jyrlaıtyn, shabyt beretin konsert boldy», dedi ol quttyqtaý sózinde.
Konserttiń basty ereksheligi – onyń janrlyq san alýandyǵy. Bul keshte klassıkalyq mýzyka, estrada men ulttyq óner, mıýzıkl teatrynyń shyǵarmashylyǵy jaqsy úılesim tapty. Konsertte Roza Rymbaeva, Erlan Rysqalı, Azamat Jyltyrkózov, Medet Chotabaev, Ardaq Balajanova, Aızada Kaponova, Gúlsim Myrzabekova, Kúnsulý Túrikpen, Asqar Muqııat, Ámire, Álibek Almadıev, Rýhııa Baıdúkenova, Azat Málik, Saltanat Meńdiǵalıeva, Birjan Aıtahmetov, Dıdar Ábdýhalyq, Áıgerim Altynbek, T&Y dýeti ónerin ortaǵa saldy. Sondaı-aq kórermender Qazaq memlekettik sımfonııalyq orkestri, «Astana sazy» qazaq folklorlyq ansambli, «Forte Trio» memlekettik trıosy, «Astana Musical» memlekettik teatry men «Saz&Soul» tobynyń ónerin tamashalaı aldy.
Qazaqkonsert basshysy Aqtoty Raıymqulova rámizderdiń 30 jyldyǵyna arnalǵan merekelik is-sharalar aldaǵy ýaqytta jalǵasyn tabatynyn aıtty. «Memlekettik rámizderdiń 30 jyldyq mereıtoıy qutty bolsyn barshamyzǵa! Rámizderde halqymyzdyń tarıhy, mádenıeti men rýhanı qundylyqtary kórinis tapqan. Patrıottyq rýh berip, otansúıgishtikke jeteleıtin rámizderimizdiń úlken mereıtoıy keńinen nasıhattalýy kerek. Osyǵan baılanysty Qazaqkonsert maýsym aıynyń sońyna deıin kórermenderge ár túrli formattaǵy is-sharalardy, atap aıtqanda, konsertter, mıýzıklder men jańa qoıylymdardy usynady. Sondaı-aq jaz boıy balalarǵa arnalǵan tegin kıno kórsetilimder ótkiziledi. «Qazaqstan» ortalyq konsert zalynyń esigi kórermender úshin árdaıym ashyq», dep málimdedi Qazaqkonsert dırektory A. Raıymqulova.