Tennısten Parıjdegi «Rolan Garros» týrnıriniń fınaldyq saıysy ıspanııalyq Rafael Nadal men norvegııalyq Kasper Rýýd arasynda ótip, alǵashqysynyń aıqyn jeńisimen aıaqtaldy.
Pıreneı túbegi tarlanynyń ataǵy alysqa jaıylǵanyn barsha jurt jaqsy biledi. Rýýd ta osal emes edi. Qazirgi kezde álemniń segizinshi raketkasy atanyp otyrǵan 23 jastaǵy skandınavııalyq saıypqyran ATR týrnırlerinde segiz ret top jarǵan. Biraq «Grýnt koroli» atanǵan sańlaqqa onyń áli jetpedi. 2 saǵat 18 mınýtqa sozylǵan fınaldyq básekede Nadal qarsylasyn 6:3, 6:3, 6:0 esebimen oısyrata utty. Osylaısha, ol óziniń týǵan kúnine tamasha syı jasap, «Rolan Garrostyń» 14 dúrkin chempıony atandy. Esterińizge sala keteıik, «Rafa» 3 maýsymda 36 jasqa toldy.
Odan bólek Ispanııanyń maqtanyshy US open dodasyn – tórt, Aýstralııanyń ashyq birinshiligi men Ýımbldondy – eki retten utty. «Úlken dýlyǵa» sanatyndaǵy jarystardaǵy jeńisteriniń jalpy sany – 22! Dál osyndaı tabysymen birde-bir tennısshi maqtana almaıdy.