Dástúrli is-shara elordanyń mańynda ornalasqan «Qazanat» atshabarynda báıgeniń tórt túrinen jáne jamby atý men teńge ilý jarysynyń ashylýymen ótti, dep habarlaıdy Egemen.kz Nur-Sultan qalasy ákimdiginiń resmı saıtyna silteme jasap.
Atshabarda ótip jatqan ulttyq sport túrlerinen jarysqa elimizdiń túkpir-túkpirinen kelgen 150-den asa sportshy men 60-qa jýyq kelisti jylqy qatysty.
Dúbirli doda aldymen Mádenıet jáne sport vıse-mınıstri Serik Jarasbaevtyń quttyqtaý sózimen ashyldy.
«2022 jylǵy jazǵy sporttyq maýsymnyń ashylýyna arnalǵan at sport jarystary óz bastaýyn aldy. Táýelsizdik jyldary bizdiń elimizde, halqymyzdyń ejelgi dástúrlerimen birge ulttyq sport túrleri de jańǵyra bastady. Olarǵa qazirgi tańda erekshe nazar aýdarylýda. Sport túrleri ishinde ulttyq sport basymdyqqa ıe. Olar – qazaq halqynyń rýhy. Sportshylarǵa joǵary nátıje tileımin. At sport túrleriniń jarystaryn ashyq dep jarııalaımyn», dedi vıse-mınıstri.
Saltanatty ashylý rásiminen keıin úsh shaqyrymdyq taı jarysy, artynsha jeti shaqyrymda qunan báıge ótti.
At jarysynyń kórkin 18 shaqyrymdyq alaman báıge qyzdyrdy. Bas júlde Nur-Sultan qalasynyń «Alǵyr» atty qarakerine buıyrdy. Ekinshi oryndy Mańǵystaý oblysynyń Aqtaý qalasynan kelgen bes jasar «Qanatyqara» qara aıǵyr enshiledi. Úshinshi orynǵa Shyǵys Qazaqstan oblysynan kelgen taza qandy bes jasar «Aqmańdaı» tory taban tiredi.
Úzdik shabandozdar men eń júırik attardyń ıelerine Nur-Sultan qalasynyń ulttyq sport túrleri qaýymdastyǵynyń demeýshiligi esebinen aqshalaı jáne baǵaly syılyqtar, sondaı-aq medaldar tabystaldy.
Aıta keteıik, jamby atý men teńge ilýden eresekter, jastar jáne jasóspirimder arasyndaǵy Qazaqstan chempıonaty 19 maýsymǵa deıin jalǵasady.
Iаǵnı, jamby atý jáne teńge ilýden eresekter arasyndaǵy Qazaqstan chempıonaty 3-6 maýsym kúnderi, jastar chempıonaty maýsymnyń 9-13, jasóspirimder chempıonaty 15-18 maýsymǵa deıin «Qazanat» atshabarynda ótedi.