Qazaqstandyq tennısshi Elena Rybakına Parıjde ótken «Rolan Garros» týrnırinde úshinshi kezeńge deıin jetkenimen, álemdik reıtıngtegi jaǵdaıyn biraz nasharlatyp aldy.
О́tken aptada ǵana WTA tiziminde 16-orynda turǵan elimizdiń birinshi raketkasy qazirgi kezde 21-satyǵa jaıǵasty. Esesine Iýlııa Pýtınseva óz jaǵdaıyn jaqsartty. Birden bes satyǵa joǵarylaǵan ol bul kúnderi 32-oryndy ıelenýde. Ýaqyt ozǵan saıyn Zarına Dıastyń nátıjesi tómendep barady. Jerlesimiz 157-oryndy qanaǵat tutýda. Áıelder arasynda Iga Shventek álemdik reıtıngte jeke-dara kósh bastap tur. Parıjdegi týrnırdegi jeńisinen keıin ol basty qarsylastary estonııalyq Anett Kontaveıt, ıspanııalyq Paýla Badosa, týnıstik Ons Jaber jáne grekııalyq Marııa Sakkarıden birshama uzap ketti.
Erler arasynda reseılik Danııl Medvedev pen germanııalyq Aleksandr Zverev Serbııanyń dańqty tennısshisi Novak Djokovıchti tuǵyrynan taıdyrdy. Tórtinshi jáne besinshi oryndarda – ıspanııalyq Rafael Nadal men norvegııalyq Kasper Rýýd. Qazaqstannyń eń úzdik oıynshysy Aleksandr Býblık 36-oryndy enshileýde.